聽完老闆S講沙田石門食肆，於是叫不時到石門做瑜伽嘅小ＹＹ帶路，於新年有空去石門行吓，點知小ＹＹ話：「唔啱你嘅，石門食肆多，平均面積細，廁所與你去慣嘅IFC、Landmark、Elements相差甚遠，怕你去到，周身唔聚財，講到食物呢，各人口味不同，老闆S鍾意嘅，或者未必啱你！」
小ＹＹ直情係潑冷水，但佢同意石門呢幾年愈來愈興旺，自成一區，以佢觀察，理由（一）石門馬鐵站吸引人流，（二）有三間學校在此（如浸會黃錦輝），學生家長多，於是湧現咗一批教育補習、輔助學校嘅小公司、連鎖品牌在此經營，帶來大批區外人士，（三）附近有資助房屋落成入伙之後，居民人數大增。
聽過小ＹＹ之言，暫且放下熱情，等過年之後再算，怎知道小ＹＹ問番轉頭：「你對黃色經濟圈有乜意見？」問題大咯，左丁山乃不折不扣自由市場派，市場以自由競爭為主，不講政治顏色，以政治言論、取向來劃分市場，應是馬克思方式，與自由民主思想不符，中國在威權一黨專政體制下，做生意順我者昌，逆我者亡，經常以14億人市場來威脅外商，封鎖國際藝人，令跨國公司集團不敢對北京哼半句，只有NBA有能力抗衡之。
中國之赤色經濟圈係用強制封關手段及禁制非政府言論而建構的，在香港搞黃色經濟圈根本冇呢個本錢，一眾黃絲恐怕無此能力，亦不應在一個自由地方施行仿效赤色左派做法，一啲人用所謂裝修手段，破壞藍色商店、連鎖店，根本係違反最基本之自由原則，左丁山不支持。至於黃絲唔幫襯藍色店，係個人消費行為，其他人應要尊重。
搞黃色經濟圈不是不可，但要順乎市場競爭原則，以服務質素取勝。譬如美心集團，已完全冇話事權之創辦人女兒伍淑清講幾嘢，以示向北京表達愚忠，咁就累到全個集團，其他姓伍嘅子孫，相信都幾無奈，氣憤冇人知，遠在西雅圖之Starbucks都畀伍婆婆氣壞。左丁山平時甚少幫襯美心，與顏色無關，只係因為成個集團之餐廳係普通貨色，夠大路平平無奇，唔夠吸引力而已。
黃色經濟圈可以搞，但香港市場大極有限，難成大氣候，至於藍色經濟圈，其實就是赤色經濟圈之21世紀版本，相等於50年前之國貨公司、五豐行之類，曾經受小市民歡迎，但卒之絕大部份受市場淘汰，雖有龐大政治力量幫忙，亦難敵市民消費喜好。原因很簡單，香港人消費，始終擇優而從之，顏色論只是一時風尚。