反送中運動上年6月爆發後，香港有班Popo一邊呻辛苦一邊狂擸OT錢，佢哋唔只賺盡納稅人血汗錢，仲連飯錢都唔放過，當八方同全港打工仔一樣返工要自己畀錢食飯，Popo就有飯盒供應，原來佢哋𠵱家啲飯盒仲要係酒店出品，唔怪得食咗成億銀，但就連累承包嘅酒店被網民狙擊。
裝CCTV監視廚房
連登討論區近日流傳兩張聲稱係畀Popo食嘅飯盒相，話由信和集團旗下尖沙嘴皇家太平洋酒店承包，最搶眼係飯盒面貼咗懶可愛撐警貼紙，分別寫上「吃得苦中苦 方為人上人」、「出面開始凍 記得食飽d啊！」嘅字句（圖），可能太嘔心啦，結果啲飯盒冇人問津被棄垃圾袋，綠色物體原來係大嘥鬼！有自稱酒店廚房職員親屬再爆料，話自從酒店承包警隊飯盒後，喺廚房裝埋CCTV，似乎好驚有人做出激烈行為囉。
選擇做Popo生意，擺明靠攏「沉默大多數」，所以即時有人拒沉默，走去皇家太平洋酒店個fb專頁洗版留言，仲清一色係投訴，有網民話員工態度差，有人話啲嘢難食，更加有人直接講酒店「整狗飯」所以一世罷幫襯。家陣香港冇咩內地旅客，酒店業冇晒生意，之前都叫苦連天，八方睇過酒店網，皇家太平洋酒店年三十晚房價減到400幾蚊，係上年最高峯價位1.5折，家陣如果撐埋警，真係要祝佢好運啦。