黃心美去年經歷家庭、事業及感情多方面挑戰，在人生低潮深深體會歌詞「能共患難才是認真的有緣」，銘記每張曾關心過她的臉。心美將這份暖帶給一群需要溫暖的毛孩，藉今日年廿八特意送上物資、食物到錦田動物庇護之家「大樹下」，為毛孩清洗住所送舊迎新，讓毛孩溫飽迎接新一年。
不離棄心穎
面對胞妹黃心穎跟許志安車廂偷食事件，心美被牽涉追訪，社交網遭留言攻擊，司儀工作受影響，甚至被指因此跟大生銀行家族後人馬桂烽分手。同時又要肩負保護家庭，心美自知要堅強：「爹哋係全世界唯一一個男人睇到我逞強，有時佢會話唔使扮到好堅強，因為咁令佢見到仲心痛。過去一年，絕大部份時間都係同爹哋一齊，每次食飯都會安慰我。」好多人認為她的工作受心穎連累，但她覺得家人是沒有甚麼拖累：「就算冇細妹件事，舊年香港發生一切，都令經濟好差。」姊妹關係無法改變，她試想過假設細妹換轉是殺人，她也會讓法律制裁細妹，但對細妹都依然會不離不棄。
瀟灑講分手
至於被指因心穎事件導致跟馬桂烽分手，心美坦言在感情上從不依賴人：「我係好瀟灑，發覺有問題就分開，唔好阻大家時間，然後默默去祝福佢。」她續說：「過去一年屋企好多新聞，我要答得體面，但又唔可以為屋企帶來更多負面嘢，我人好直，唔會轉彎抹角，答到我就答，答唔到我就唔回應，所以我一開始對感情問題唔回應。」咬實牙關跨過低潮，她笑說：「或者我根本冇勇氣去死，以前覺得人生最痛苦係離婚嗰段時間，過咗舊年，真係覺得離婚嗰段時間算乜嘢。」並坦言去年不只她一家人，香港人心情都好負面，她說：「希望嚟緊鼠年全香港，所有香港人都越來越好。」
採訪：馬建華
攝影：林賓尼
場地提供：大樹下善待動物庇護站