鼠年仲有幾日就到，香港人喺農曆新年就梗係四出拜年，派吓利是，今年八方好多朋友都四圍搵同五大訴求、光復香港主題有關利是封，實行拜年不忘文宣，當然未必所有市民會用文宣利是封，不過如果有種利是封，一拎出嚟即時令人知你係藍絲、甚至係差人，呢種「起底利是封」，唔知一般市民、甚至藍絲，警察自己敢唔敢用呢？
累人累己被起底
八方有朋友日前收到一叠人哋轉送嘅利是封（圖），成叠用土豪金印製，望落除咗娘同俗之外，原本冇乜特別，勉強可以用，點知佢留心睇利是封上面嘅字，竟然印咗差人最新座右銘：「忠誠勇毅 心繫社會」八隻字，即使暗叫不妙，好彩留心睇一睇，唔係一下唔為意用咗嚟派畀人，又或隨手轉送畀人，就真係累人累己，隨時得罪親朋戚友。
但問題係乜嘢天才會印「忠誠勇毅 心繫社會」利是封？班藍絲咁怕俾人起底，冇理由周街派呢種利是，真係唔怕俾人私了咩？如果係警隊自己印，班差人畀藍絲更怕俾人起底，怕影響家人仔女，即使警隊送畀差人派，怕且除咗圍爐派畀自己人外，一派畀外人咪即自揭係差人？有冇人仲會用？