基斯坦奴朗拿度（C朗）同美斯呢對球壇絕代雙驕，由2000年初開始崛起，到10年代佢哋兩個都成為球王級人馬。點知佢哋到咗20年代，步入職業生涯嘅後期依然繼續鬥，今次就鬥個人喺五大聯賽總入球數。
話說星期日C朗代表祖雲達斯喺意甲上陣，並喺對帕爾馬嘅比賽度梅開二度，幫祖記主場贏2:1，令佢個人嘅5大聯賽總入球已經增加至432球，成功追平宿敵美斯嘅數據。但話口未完，美斯喺較後時間開波嘅西甲主場對CF格拉蘭達比賽度，射入奠定勝局嘅一球，幫巴塞隆拿小勝1:0，隨即又將個人聯賽總入球數增至433球，再一次超前C朗。早前美斯受訪時話，佢同C朗兩個嘅競爭關係非常特別，相信球迷仍然樂意見證兩大天王未來繼續鬥落去。