無綫昔日風光不再，73歲的老戲骨劉江及新聞主播張文采先後離巢，談到近年無綫作風，兩人都大嘆無奈。劉江於台慶頒獎禮當晚宣佈離開效力37年的無綫，事後問其離巢原因，劉江說：「唔可以話TVB唔好，可能有啲轉變，佢哋覺得我哋唔重要，好難講。」暗指無綫待薄老員工。
早前有報道指劉江離巢是不斷被減人工，由高峯期6萬元減到7,500元，前日劉江接受周刊訪問時爆遭無綫削一半人工：「𠵱家仲減騷，真係冇得再做，興趣還興趣，都要食飯。」他說打工有底線，尤其通宵開工後，翌日還要捱眼瞓駕車回家，但現在的人工連車也養不起，難以做下去。昨日劉江回覆《蘋果》，問到是否遭減人工及工作量而離巢？他說：「係咩？我係自動減嘅，正常，我唔做喇，諗住退休。冇錯吖，我要求減吖嘛，我都諗住退，因為捱唔到，年紀大。」至於其他電視台有否邀拍劇？劉江只說：「唔知。」
「接受唔到辭職」
同樣在無綫做了十年主播的張文采，已於去年11月離職，近日她接受商台訪問時說：「十年前入TVB好威，但近年嚟應徵嘅人少咗好多，甚至係冇！每間公司都有唔同政策，接受唔到咪辭職囉，所以辭咗職。」談到2011年與羅鈞滿拍拖被狗仔隊追蹤，張文采說：「冇諗過喺娛樂版出現，第一次驚到跑走，匿埋角落個心卜卜跳，冇俾高層照肺，老細只提醒我出街唔好咁親密。」她又為穿短裙被照肺一事平反：「主播唔可以接受訪問，嗰條唔係短裙，係褲嚟，係雜誌砌我生豬肉，老闆都知。當時有冤無路訴，喊咗好耐。」
採訪：魯吉
