AGA（江海迦）說，這一句「係咪我啲作品有問題？」是她仍未有機會簽約唱片公司時，一直在寫歌等運到的那幾年間，經常反覆問自己的問題。
有乜慘得過日日等機會？AGA從小已經目標明確，一心成為創作歌手，她說自己是一步一步走來，向夢想進發的。如果紅館是每一個歌手的成名夢，AGA實現了，4月將踏上台板開個人演唱會。
當香港女歌手市場一池死水的時候，AGA的歌曲是小數可以入屋又貼地的示範。西班牙裔混血兒的她，創作背後都有故事，如《Ginadoll》的碟名是以她的亡姊Ig賬號而取名的；又如《Luna》在西班牙語解作「月亮」，今次演唱會的名字，又是另一個故事……
AGA說：「我細個好鍾意玉置浩二㗎！我好鍾意林子祥、我好鍾意林憶蓮、許冠傑，我覺得好正呀！梅艷芳又有佢自己genre（風格）嘅人！」老好名字，隔代相傳，下一波，應該由AGA接力吧！
撰文：文嘉龍
攝影：沈健程
好細個目標已經好明確
今次演唱會的名字叫做「Round Midnight」，其實是一首爵士老歌的歌名，也是AGA在17歲第一次上台的故事。那一年，她在中環的一間餐廳第一次獻唱，就是這首歌。「近中環街市一間好細嘅restaurant bar有Live music，我就係啱啱開始第一次去jam歌，嗰班朋友係玩jazz嘅musicians，佢哋話唔緊要啦，都冇人，嗰時係一個人都冇㗎嗰間餐廳，我就上台唱吓當玩，第一次上台攞住支咪唱歌，嗰個感覺我記得係好美好嘅！」
在香港出生成長的AGA，可說生在音樂世家，父親為表演樂手，母親精通音樂，兩位家姐亦會跟隨父親表演，AGA就主力鋼琴，「其實彈琴唔係爹哋教我，我爹哋唔識彈琴，彈琴係我9歲聽收音機嘅時候學㗎，唔知點解，我識得撳返啲音出嚟，我仲記得嗰時係播嗰首《Big Big World》，我就喺度彈彈彈，又彈到喎！爹哋就買《勁歌金曲》嗰啲琴書畀我，或者一啲folk music嘅琴書，我就自己喺度練！」
為了可以喺外國讀音樂，AGA中五畢業後，和姐姐一同考上空姐，當上國泰空姐的那四年間，她只想為了儲錢，然後到外國。「好細個目標已經好明確，唔知自己會唱歌㗎，但係好想做concert pianist，或者做電影配樂。其實開始去考空姐嘅時候已經知道自己想入Berklee（柏克萊音樂學院），睇吓自己afford到去邊度啦！其實幾得意，正正想做呢件事嘅時候，當中遇到好多唔同嘅音樂人，其中一個最重要嘅係舒文（唱片監製）囉！」
AGA由跟Ted Lo（爵士樂手羅尚正、側田三叔）學琴開始，「Ted Lo係我鋼琴老師，佢帶我去一個地方叫Peel Fresco喺上環，全香港嘅musicians都會喺嗰度jam歌，佢介紹我畀好多musicians識，其中一個就係Anthony Fernandes（張學友、王菲的鼓手），佢問我有冇試過唱歌，有冇試過casting呀，我話no，冇呀，佢就介紹咗我畀舒文識，畀咗個電話我，咁就第一次去casting！」
簽了給舒文，AGA索性辭去空姐一職，全程投入創作，四年間寫下了無數demo卻沒有人賞識，一等四年，才獲第一首被採用而成功推出的作品，就是2012年鄭融的《第五類》。
屋企電視唔會播TVB㗎
等待過程充滿懷疑和恐懼，「過程當中你會有好多嘅doubt（懷疑）啦，因為前面對我當時嚟講係黑色嘅，完全睇唔到前面，因為當你all in去做一件事嘅時候，你冇plan b，你一定係睇唔到前面係點，但係you just keep on doing，一首歌一個機會囉！我同自己講一定得嘅，香港咁細應該冇懷才不遇啩，哈哈！寫到第四年嘅時候，啲歌就開始俾人賞識囉！」
AGA辭去空姐一職，沒有收入也得捱下去，「雖然係好難過，financially（經濟上）係好難過，但係嗰一年係非常之重要，因為我自己take得最多practice嘅一年，我join咗好多唔同嘅band，又幫人錄和音，又幫人唱demo，我免費都冇所謂，我想有experience去做呢件事。雖然好難捱，亦都有佢好好玩嘅一面，當我自己覺得最難捱嘅時間，係第三年尾，自己突然間有一個禮拜喺間房度冇出過嚟，淨係寫歌，直情唔出房呀！」
即使沒有收入，AGA說她都是靠自己支撐，但總有情緒低落的一刻，閃過放棄念頭。「其實我從來冇靠過屋企，全部係自己做空姐時期儲嘅錢，或者幫人唱demo同和音（賺錢），但係去到第三年就覺得，應唔應該繼續呢，係咪我啲作品有問題，我覺得『係咪我啲作品有問題』呢一句係令到自己最難受，因為你懷疑自己究竟向唔向前行，繼續去做呢件事，定係你返番去之前嘅生活，一個好平安嘅生活呢，you have to choose！好多謝嗰陣時嘅自己，真係硬頸到不得了，冇人講得我郁！我唔識得點樣去handle情緒，其實我覺得係有少少depression，所以我先至一個禮拜唔出間房！」
屋企人從來都是最佳保護罩，何況全家都有共同最親密的溝通語言，音樂。「其實我屋企係六國大封相，因為我爸爸係玩rock、folk music，佢又聽日文歌又聽中文歌；我個大家姐呢，佢係拉Violin嘅其實，拉Violin彈結他唱女高音，但係又鍾意heavy metal；我就淨係鍾意jazz同埋R&B同埋情歌囉，所以我細細個電視係唔會播TVB㗎，電視係永遠播緊concert，我返學嘅鬧鐘就係我爹哋練結他嘅聲，對我嚟講就係起身返學喇！大個發覺慢慢呢啲變咗係我嘅music library，所以其實都好多謝我爸爸！」
不止要多謝爸爸，還有與她感情最深的二家姐。AGA在2012年簽約環球後，2014年憑《一》爆紅更在年尾頒獎禮橫掃獎項，可惜那時候卻遇上二家姐患上末期肺癌離世。事隔四年多，AGA仍未能釋懷。她說：「其實我到呢一刻都未get over呢件事，或者係未接受到呢件事！我成日都會覺得，哦，佢去咗澳洲啫（AGA家人定居澳洲）……」
三年異地戀分手收場
由細到大與二家姐感情深厚，AGA說兩姊妹就像Twins，「有陣時even發夢嘅時候會見到佢，但係好得意，我哋由細到大都係好似一對twins，我哋同一間學校，一齊返學一齊放學，又成日講埋同一句嘢，佢諗乜嘢，我都會知佢諗乜囉！我有陣時好掛住佢，想同佢講我開紅館喇，其實我亦都知佢會點回答囉！我覺得我同我家姐已經喺我自己嘅內心，每一次上台我都會祈禱，覺得佢都係同我一齊。」
2015年的一曲《若》就是為紀念二家姐而寫的，「以前每一次去完頒獎禮，佢就會攞我啲獎影相，同埋每一次頒獎禮佢都會到，even佢病嗰時喺醫院，佢都同醫生講，話可唔可以出去頒獎禮再返嚟，佢係咁support我囉，我諗冇佢，我自己都唔會堅持到咁耐！但係佢係我哋屋企裏面唯一一個唔係好識音樂嘅人，佢係一個寫字嘅人。我覺得呢短短27年（2015年病逝）同佢相處嘅時候，我會覺得佢係我一個人生嘅老師！」
AGA說自己是一個感情用事的人，小小事情已經可以觸動到她，「我係一個好sensitive（敏感）嘅人，亦都好sentimental（感性），即係感情用事嘅人，好投入㗎！我喺某一段感情入面感受好大囉，亦都可能係做一啲好細微嘅嘢，我已經好大感受，或者我為人哋去做一啲嘢，已經覺得好正，even我睇套戲都會係好代入！」
感情澎湃最啱創作，她將自己的一段異地戀寫進歌裏。「我第一首作品係《Better Me》，呢首歌其實係寫我同我第一個男朋友，分咗手之後寫嘅呢首歌。同佢嘅關係好特別，同佢相識咗三個月，一齊咗三個月之後，佢就走咗三年，即係一個long distance嘅關係嗰三年，到第四年，當佢返到嚟香港嘅時候，先知道原來唔work囉，因為long distance大家見到大家嘅時候會好珍惜，所以有好多嘢都會好容忍，嗰時先知道自己有好多嘢做得唔夠好，所以我就寫咗《Better Me》呢首歌，『I can smile a little more, Sing a little more, Feel a little more......』反而係呢首歌帶咗我入音樂圈，第一次就帶咗呢首歌見舒文囉！」
現在總算追夢成功，AGA不忘初心，「喺我成長過程當中咁多音樂人包圍住自己，我亦都睇到無數咁多失敗嘅例子，無數人放棄嘅例子，即係一日24個鐘頭，你擺幾多個鐘頭落去練歌，你先至可以上到一個好細嘅舞台……所以當我第一日見舒文嘅時候，佢已經叫我，佢好驚啲人發明星夢，佢成日話，真係冇錢㗎，嗱，冇錢㗎做音樂，我話知喇知喇，但係呢樣嘢係我鍾意做，係我想做嘅！」
【後記】M記駐場歌手
為了應付紅館騷，AGA近來進行地獄式訓練，現場所見的確清減了，她說：「第一次瞓身去面對自己嘅弱點，就係physical training！之前自己有跑過馬拉松，但係第一次跟一個運動員嘅教練，由我第一次去，去完之後乜嘢工作都做唔到，我面青口唇白，到𠵱家我做完之後，都好似應付到喎，又精神咗，開始感受到自己身體嘅改變囉！」
這些年，AGA的歌（環球旗下）不時在M記循環播放，洗腦式宣傳而被網民稱為「M記駐場歌手」，現在要食M記？看來要戒口了！
化妝：Vanessa Wong
髮型：Kolen of HAIR@M
服裝提供：Lane Crawford
