農曆新年前兩星期一個平日的下午，被稱為元朗食街的又新街，比起半年前回復了「人氣」，斷斷續續都有街坊走到近大馬路的其奧花生糖專門店辦年貨。主打自家製潮式花生糖的中式糖果店，「食粥食飯」還看農曆年旺季，扎根又新街接近三十年，第二代掌舵人坦言今年看淡巿道，不敢預備過多年貨，畢竟街道看似熱鬧起來，但曾在元朗發生的恐襲，始終是巿民心裏的一根刺，鬱結未解。
記者：張珮琪
攝影：梁瑞帆
科大畢業 子承父業常吵架
31歲的黃廣鵬（Jason）是家中獨子，亦是其奧第二代老闆，爸爸黃岳永人到中年才結婚生子，現年79歲，別小看拿起鏟子混和糖漿、花生及芝麻，製成花生糖所需的氣力，老人家坦言是吃力的，若兒子不繼承小店，可能數年前其奧已做不下去，現時他和太太兩老只會閒時落舖幫手。
黃岳永是潮州人，上一代在鄉下已懂得自製蔗糖謀生，他亦學得一技傍身。五十年代偷渡來港後，做過米舖苦力、在九龍城做小販賣自製糖果，「一磚一磚揼出嚟賣畀小朋友，斗零一嚿手指公咁大。」行船後終結束漂泊歲月結婚生子，定居元朗，重拾製糖手藝，於90年代開設其奧賣手製花生糖。
「父母係年中無休，佢哋係非常非常之勤力，就算我𠵱家都冇辦法同佢哋比，佢哋真係捱返嚟，佢哋後生時唔係求生活，係求生存。」所以Jason讀小學時，放學及放假已開始在店內跟頭跟尾，他笑言：「所以我寧願返學。」直至中五會考那年的農曆年前夕更令他畢生難忘。
「因為新年係我哋最旺嘅時候，嗰時要幫手，但睇住身邊同學已經溫咗一輪嘅書，準備溫第二輪，我係未開始，個心好慌，好緊張，到底我仲有冇得讀上去呢，但我父母用咗我小學模式去思考中學會考，諗住前一晚溫書就得。嗰時咁啱唔見銀包要去警署報失，書又未溫，又喺最忙嘅時候唔見咗銀包，要阿媽丟低手頭上嘅工作陪我去報失，係最灰最灰嘅時候，我就忍唔住喊咗出嚟，同阿媽講，我要溫書呀。」每日從早到晚在圖書館溫書與時間競賽，最後他勉強能轉校升讀預科，之後更考入科大機械工程系。
九年前將近大學畢業，黃爸爸問他會否回舖頭工作，分析過自己的優劣強弱，「反正自己成績唔係好，喺機械工程方面應該冇乜發展。如果佢哋唔做嘅話，呢門手藝就會買少見少，都覺得係可惜。」遂嘗試學做生意。
坦言當初不喜歡文商科才選讀機械工程的Jason，近兩、三年才正式全盤接手生意，「一開始唔識得睇天氣，手忙腳亂落錯材料都試過。」他指煮糖漿最主要視乎季節氣溫，調節時間及火喉，否則會影響混和的過程及糖的軟硬度。
不過，Jason指學做花生糖不難，如何不因一家人共事而傷感情才是最難。「最承受唔到係同父母之間嘅爭吵，大至裝修、更換設備，細至𠵱家要做白芝麻花生糖先，定係黑芝麻花生糖先，呢啲嘢都可以拗。」他眼見聘請的女工做到腰痠背痛，對此感到歉疚，之前進行裝修改善工作環境及工具、將工序攤長、平均分擔，「我覺得我諗嘅方向係多贏，諗啲方法係令大家都好。」奈何曾經不獲父母認同及信任。
「試過嗌交嗌到成條街都聽到，我就丟低啲嘢話唔做喇，你哋自己想點就點啦。通常走咗去唔夠一日就會收到電話叫我返嚟幫手。阿媽打得嚟我都知乜事，因為真係好辛苦，我冇喺度幫手打點啲嘢會好亂，會唔夠貨，夥計唔知要做邊樣嘢先，好多甩漏。」
畢竟Jason的確是黃岳永口中的孝順仔，氣消了還是不忍，要回去主持大局。近期生意難做，他直言不是他所能控制，他可以做的就是維持出品的水準，秉持老父的堅持：真材實料、衞生、美味。客人讚賞他撈花生糖的功架，已讓他感到滿足。
用舖頭名義捐錢 「啱嘅就去做」
抗爭運動以來，「黃絲」對「紅底」越發抗拒，8歲由內地來港定居的Jason說：「我唔係喺度出世，但我喺度成長，同埋有啲事，同你係邊度人冇關係，係睇你個價值觀係點樣咋嘛，我認為我同大部份人嘅價值觀相近，有啲嘢係接受唔到就接受唔到。」
說的正是去年元朗發生的7.21事件，「我諗大家都一樣，睇住直播，徹夜難眠，想像唔到呢啲事會喺香港發生，仲離我咁近㖭，嗰時我就住喺西鐵站附近。」去年8月，他原本計劃將在美食博覽展銷所得一半純利，捐給支援被捕人士的基金，結果蝕本離場，但他仍自掏腰包，「因為你見到其他人為呢個社會作出好重大嘅犧牲，自己可以做嘅嘢係好少，（捐款）多少都好，做自己可以做到嘅嘢。」以店舖名義捐錢，亦曾引起父母的擔憂，勸他要低調行事；三個月後，他還是以店舖名義再向另一基金捐款，與他經營其奧的理念一樣，「覺得自己做嘅嘢係啱咪做囉，我做嘅嘢又唔係傷天害理。」
回想在其奧跟爸爸學做花生糖初期，曾想過希望五年之內能夠開分店，如今五年之期已過，Jason笑說：「嗰時太天真，開分店比自己想像難太多，實際做落去發覺要打理嘅嘢實在太多，喺商場或者展覽擺啲短期檔口仔都差啲顧唔掂，所以暫時都係做好呢間舖先。」
「我從老竇做嘢嘅心態都見到有工匠嘅影子喺度，譬如你批評佢啲糖做得唔好，如果佢認為自己做得好，佢會嬲嘅，如果佢知道自己衰呢，佢會去改嘅。」說到底，都是緊張自己出品的效果，緊隨爸爸認真做糖的態度，相信就是Jason所說的，做對的事。
港故事
有些人有些事，越是美好越留不住。本土手藝、傳統行業、街頭老店，都帶給我們生活的溫度和記憶的厚度，如果你知道有這樣的故事，歡迎提供。（致電或WhatsApp 6383 6568 註明「港故事」）。