歐洲足協（UEFA）周三喺官方公佈2019年度最佳陣容，上季歐聯盟主利物浦理所當然係大贏家，11席佔咗5席。
紅軍喺今次網上超過200萬張投票中，有沙迪奧文尼、安德魯羅拔臣、華基爾雲迪積克（VVD）、阿歷山大阿諾特同艾利臣比加入選。除咗VVD，其他四位都係首次。另外，美斯同基斯坦奴朗拿度（C朗）兩大球王亦繼續有份，後者仲要破紀錄連續13年入選，加埋04年總共紀錄性14次獲獎，但就有媒體爆C朗只係喺前鋒選擇中第四多票，UEFA為咗畀面佢，就犧牲中場第三多票嘅尼高路簡迪，夾硬將個陣變成4-2-4。
另一項體壇大獎勞倫斯獎，利物浦就入圍最佳團隊同年度最佳東山再起獎。另外，紅軍前鋒羅拔圖法明奴最近就喺屋企大宅嘅泳池受浸，艾利臣都有份嚟睇浸禮同幫老友落水，場面感人。