才子徐緣（本名徐俊文）月前疑背妻偷食，上月疑似徐太在fb點名斥落選港姐鍾溥敏「拆散了我的家」，徐緣月初直認「做錯」。不過，徐緣和Mandy前晚在旺角蹺手行街斷正，肆無忌憚玩婚外情，更有疑似徐緣姨仔在網上公開鬧爆徐緣。
現年43歲的廣告界才子徐俊文，多年來以女兒名字「徐緣」作筆名，上月被指背妻偷食現年34歲的2009年落選港姐鍾溥敏（Mandy），徐緣隨後認錯，指自己對妻女有虧欠，又表示與妻子有共識，不會再以「徐緣」作筆名，改回本名寫作。《蘋果》收到讀者爆相爆片，指前晚約7時，在旺角砵蘭街附近見到徐緣和Mandy：「佢哋喺等過馬路嘅時候，齊齊戴上口罩，之後行向朗豪坊方向。」讀者提供的相片和短片雖然只得兩人的背面，但徐緣的招牌灰白髮非常易認，相中長髮女子着短裙騷腿，蹺實徐緣的左手行街，讀者指她的樣子很像Mandy。
《蘋果》昨致電Mandy求證，她在措手不及下咿咿哦哦：「喺旺角？哦，er……」停頓後數秒說：「係呀，好似開完會。」問到不怕被指做第三者？影響了徐緣的屋企？她說：「Er，都有啲困擾嘅。」Mandy指與徐緣是工作關係：「不過𠵱家工作上都有啲影響，可能好多project都停咗，噚日喺朗豪坊傾project，傾完分開咗。」
多口爆離婚
雖然蹺手行街，但Mandy死撐兩人沒有拍拖，不涉及男女感情，對於徐緣在社交網承認虧欠太太和女兒，問Mandy有甚麼想解釋？她支吾說：「我諗佢哋兩個嘅感情事，佢哋處理返，但係我就……應該唔係好關我事，我只可以咁講。」問到徐緣有否向她展開追求？Mandy停頓數秒說：「唔……我諗……總之𠵱家冇任何發展。」之前呢？她說：「之前都冇。」Mandy又強調自己不會做第三者，問到會否發誓跟徐緣真的沒有關係？她靜了一會說：「我只可以發誓，佢離婚，佢嘅感情，我係冇介入。」
由於徐緣在fb中沒透露會離婚，堅稱跟他只是工作關係的Mandy，卻率先代爆，問到是否徐緣跟她說會離婚？Mandy知道衰多口後緊張說：「我淨係知佢哋傾緊，唔係太知佢嘅決定係點。」如果他離婚後，兩人會否有機會發展？她說：「嘩，我諗𠵱家都係顧好份工先。」至於現時有否男友？她說：「分開咗一段時間，上年嘅事。」Mandy又否認跟徐緣有關：「拍咗幾年，大家有啲嘢唔夾。」
被鬧指「人渣」
雖然Mandy聲稱跟徐緣是工作關係，但有兩位疑是徐太胞妹日前在徐緣fb留言鬧爆：「你呢個人渣，由始至終你有冇同我家姐及緣緣親自道歉過……呢頭叫我家姐畀時間你諗清楚，嗰頭同鍾溥敏去高雄。」另一人則留言：「我家姐要求唔只係改名，係要你delete咗個page。」更指徐緣不肯放棄逾9萬的追蹤者，是間接消費女兒的名字。徐緣的fb專頁昨日已經消失，疑是自刪避風頭。
採訪：皓騫