趣趣地：曼聯屠狼損福仔大鑊

曼聯禮拜三憑住桑馬達下半場成功破網，喺英格蘭足總盃第3圈重賽以1:0淘汰狼隊晉級。不過，後備上陣嘅拉舒福特比賽咗16分鐘，就因為同狼隊嘅馬特杜靴迪爭波時受傷退下火線，下禮拜日作客利物浦嘅英超賽事未知能唔能夠趕得切復出。領隊蘇斯克查賽後就話，福仔本身背部已有問題，𠵱家再被撞到，直情連跑都有問題，未來幾日要繼續觀察。