C六年前患上焦慮抑鬱，最近，因為工作壓力出現復發，返工時心跳加速，最高達每分鐘一百二十，頭實、精神不集中，沒辦法看文件，記性差，腦轉數越來越慢，試過一次突然頭暈，以為自己心臟病發，但檢查卻沒有問題，除此以外，主要是焦慮情緒，C經常沒辦法控制自己的腦袋loop住，想着工作的問題，所以晚上睡在床上，不能入睡，需要服用安眠藥。
接受過治療後，C的情況穩定下來，徵狀逐步減退，當C差不多回復正常時，突然明白到自己問題所在：「醫生，其實我知道我嘅問題係投入得滯，我老細最近同我講，我對我自己嘅要求比起佢對我嘅要求仲要高，不過我𠵱家已經小心好多㗎喇，會刻意比自己放鬆落嚟，例如返工嘅時候我唔會好似之前，晨早八點零chur到夜晚九點，𠵱家隔個幾鐘我就會休息吓……
以前我係完全停唔到落嚟，做完手頭上嘅嘢，一有空檔，我又會諗之後要做嘅projects，有陣時一、兩個月之後先至發生嘅事情，我已經會提早開始做，如果唔係我會覺得好內疚，覺得自己浪費時間，𠵱家我學識取得平衡，要勤力，不過亦都唔好過咗龍，捱壞自己。
我𠵱家比以前早咗好多放工，最遲都係七點，返到屋企我專登做啲無聊嘅嘢，唔再睇電郵，唔再諗公司嘅嘢，要刻意比自己放鬆落嚟……𠵱家我唯一剩番嘅就係間唔中覺得頭緊，通常同多嘢做有關，不過都係緊一、兩日，比之前嘅頭痛頭實已經好好多，𠵱家一緊，我就會早啲放工，甚至如果工作唔係太忙嘅話，我會比自己第二日放半日假休息一下，咁啲緊就無咁快會走翻出嚟……」
其實C像不少香港打工仔一樣，一方面希望勤力一點，表現好一點，為公司盡力，也爭取以後升職加人工的機會，但另一方面，工作過勞又可能會影響健康，如何能夠在工作和健康之間取得平衡，防止自己投入得滯，C以上的反省和剖白，可以供參考。C說得非常對，收工後要放鬆下來，可能需要刻意的安排，要專登「搵無聊嘢去做」，不然的話，日間繃緊的情緒便可能不知不覺地延續下去。
http://fb.me/1486drlee
李德誠 精神科專科醫生
想輕輕鬆鬆健康啲，記住留意健康蘋台
http://health.appledaily.com.hk/