黃子華賣樓集資、自編自導自演嘅賀歲片《乜代宗師》今個農曆新年上映，碌盡人情卡搵演員同幕後幫手，當中嘅電影主題曲《上善若水》，子華仲搵組合農夫合作，由C君作曲、農夫負責填詞，當中有唔少係子華嘅構思，主題曲MV噚日曝光。
全首主題曲歌詞連副歌合共七百幾字，子華化身rapper同農夫齊齊rap，而洋洋數百字絕對係言之有物，開頭第一句「如果，有高低有光輝有式微，有崎嶇有喜都有悲有乜嘢出奇」，似係講述現今香港電影圈嘅狀況，曾經有過光輝年代，即使遇上低谷，憑香港人靈活變通，始終會有出路。
出自李小龍名言
另外，子華rap嘅歌詞中亦包含唔少哲理，當中一句「以無法為有」，出自李小龍截拳道所講「以無法為有法，以無限為有限。」簡單而言就係無招勝有招，不拘泥於招式。至於副歌部份，當中嘅「My Friend」亦係出自李小龍名言「Be water my friend」，因為李小龍曾喺訪問中講過「清空你的思想，無形無法，像水一樣」，以此應對各項境況。其實喺香港逆權運動初期，示威者經常呼籲同路人奉行「Be water」策略，所以英國金融時報亦曾以「Water Revolution」稱呼香港嘅抗爭運動。
撰文：馮仁昭