【娛樂人物】現年73歲的劉江效力無綫長達32年，演出不少經典劇集，前日他正式約滿離開。劉江否認因被減人工而離開，但直言近年在無綫拍劇「日接夜、夜接日」，十分辛苦。加上近年不少好戲之人接連離開無綫，劉江批評演員間已出現斷層情況，沒好對手的情況下自己也毫無發揮。
採訪：皓騫
劉江服務無綫32年，前日正式離巢，昨日是他回復自由身的第一天，早上臨出門做運動前接受《蘋果》電話專訪：「心情好平常，冇乜起伏，因為呢個日子嚟嘞，我都要接受，呢個決定係好難，但已經決定咗，心情都係好開心。之後會去旅行，喺台灣過年。」有報道指劉江離開皆因近年不斷被無綫減人工，由高峯期6萬元減到7,500元，早前傾續約又被要求減騷，令他連續失眠兩晚，最終忍痛決定離開，但劉江否認：「7,500蚊？冇呢啲事，係我唔想做，30個騷點會7,500蚊㗎大佬，黐線，呢啲唔知乜嘢人計出嚟。我瞓唔着係諗住做定唔做，但決定時感情上都係有啲唔好受，因為我始終工作咗30幾年。」
梗有唔開心
劉江反而覺得現在拍劇相當辛苦：「我一直同公司講做少啲，呢個好正常，鍾意做戲都冇用，有時太辛苦，年紀大做唔到，70幾歲，夜晚開完廠，揸車返新界，第二朝8、9點又開工，你捱唔捱到？係咪，電視係咁樣。」在無綫服務多年，劉江感受很深：「我做咗30幾年，我生活安定都係佢畀我，咁你喺一個機構做，梗有開心唔開心，呢啲好平常，唔可以期望一間公司由頭到尾都咁乜嘢，況且佢𠵱家環境都唔好，呢啲好正常。」
近年越來越少觀眾看無綫，由一台獨大風光期滑落至現在被離棄，會否覺得心淡？劉江說：「呢個係規律，以前我哋喺佳藝電視、麗的電視，求人去睇都冇人睇，個個都衝去睇無綫。好啦，到我過咗無綫之後，佢哋睇返麗的，咁好睇，我話係呀，𠵱家話好睇都死啦，麗的消失咗。𠵱家話無綫啲嘢唔好睇，咁唔好睇又點箒，你哋成日都衝入去話好嘢嘛，呢啲好正常。」覺得現在無綫劇集水準如何？劉江語重心長說：「水準呢，其實係向好嘅，個個都想做好啲，因為少人睇咗，呢個係正常。」閒時有否看劇？他坦言：「冇呀。」已經沒興趣追劇？冇一套吸引？他笑言：「自己做嗰啲咪有囉，或者人哋話呢套劇好睇，都會望吓，睇吓人哋水平去到邊。」
總會江湖見
拍劇多年最開心是那段時間？劉江說：「唔開心時可能遇到好劇又開心，所以冇話邊段時間開心，不過，人呢越嚟越好多人離開咗，開始有斷層，做戲上比較難做啲。」視后田蕊妮前日亦宣佈約滿離開，劉江愕然表示不知情，是否覺得好戲之人陸續走，冇一個可以跟他交到手？劉江笑稱：「可以咁講。」高手跟老戲骨一個接一個離開，劉江笑言：「所以我都好想行出嚟，睇吓有冇人搵吓我，遇吓啲對手，都係一件好事。」想跟那人合作？他說：「我唔知呀，我都唔知有乜人喺度，我喺TVB咁耐，出面點樣我都唔知。」有公司招手嗎？劉江口密說：「唔知，總會江湖見！」