熱刺喺星期二英足盃第三圈重賽，以2:1淘汰英冠嘅米杜士堡，贏波晉級本來係開心嘅，不過今場有份上陣嘅熱刺中場基斯甸艾歷臣就未必咁諗喇，事關唔肯續約嘅佢好大機會喺冬窗離隊，所以有部份熱刺球迷向佢喝倒彩，但主帥摩連奴賽後反而維護呢位中場，話佢即使走人在即，仍然好專業，仲鼓勵對方要抬高頭離開熱刺，可能因為佢已經借咗葡萄牙中場謝特臣費南迪斯頂替。
盧施素極速得「米」
熱刺賽前錄得四戰不勝，包括上星期英足盃作客「英冠仔」米堡踢成1:1，結果要喺今個星期重賽，但返到主場就冇再甩拖，開波兩分鐘就由今季喺貝迪斯借用嘅阿根廷中場盧施素破網。踢到15分鐘，拉美拿又喺前場逼搶成功，之後長驅直進入禁區射成2:0。米堡要到82分鐘，先由後備上陣嘅佐治沙維利入波追成1:2，但為時已晚，晉級嘅熱刺下圈會作客修咸頓。摩佬賽後就話對球隊今場嘅前場壓迫同快速反擊好滿意。
不過，熱刺中場艾歷臣可能踢埋今場就同呢間效力咗近七年嘅球會講再見，今夏約滿嘅佢一心希望出去見識吓，所以唔肯續約，外界預計熱刺會喺一月被迫賣佢，而意甲嘅國際米蘭就係最大嘅潛在買家。不過英媒透露，兩間球會仲未傾掂數，因為國際只係開出1,000萬鎊嘅價錢，同熱刺要求嘅2,000萬鎊差一半。
借得賓菲加中場謝特臣
艾歷臣一心想外闖，不過熱刺嘅球迷似乎接受唔到，今場艾歷臣每逢掂波都被喝倒彩，相當無癮。摩連奴就繼續力撐呢位丹麥國腳：「艾歷臣今場表現好好，而且非常專業，完全符合我對佢嘅要求。如果佢決定要離開熱刺，我相信佢可以挺起胸膛咁離開。」艾歷臣好大機會離隊，而今場入波嘅盧施素亦有潛質接棒做中場核心，同時球隊都喺星期三搞掂21歲葡萄牙中場謝特臣費南迪斯單交易，從賓菲加借用呢位小將18個月，仲設買斷條款，睇嚟摩佬已經有晒準備。