差人形象差就係人都知，特別對大學生、後生仔嚟講，相信除咗建制派嗰班外，冇乜人想見到Popo，不過班Popo似乎冇乜自知之明，好似佢哋想約中大社工系學生閉門對話，俾人踢爆搞唔成，又唔諗諗人哋點解咁怕黐埋佢哋，反而老羞成怒喺fb發文發爛渣，批評「有心人」惡意離間挑撥喎！
斥有人惡意破壞關係
話說日前坊間爆出，有位中大社工系老師因工作關係識啲警隊高層，想促成一次閉門對話，預備前晚喺秘密地點進行，Popo睇嚟對呢次秘密交流都十拿九穩，殊不知有WhatsApp對話流出令件事揚咗，令好多中大同學議論紛紛，中大社工系糸會立即向同學收集問卷，96個學生當中超過七成希望取消呢次閉門對話，仲發聲明話唔想外界認為中大社工系意圖成為大台。講到咁，呢場閉門對話梗搞唔成。班Popo自然嬲豬，噚日喺fb發文譴責，又鬧有人惡意破壞，煽動仇警同分化警民關係。
不過八方覺得，若然Popo形象好、冇打壓年輕人，不論公開定閉門，班社工系學生點會唔肯見？又唔見大學生、後生仔唔肯見黃之鋒、岑子杰？Popo做過乜心知肚明，否則使也鬼祟閉門私下約見，光明正大行入中大，莫講社工系，乜嘢系學生都見到同對話，仲好意思發爛渣鬧人？八方亦好欣賞中大社工同學仔嘅成熟，做人最忌「因小失大」，見Popo喇喎，每逢周末佢哋都會出現。同學間最重要係互相尊重，避免出現分化。
李八方