駱惠寧嚟咗香港做中聯辦主任，噚日就要主持中聯辦新春酒會，致辭嗰陣又係大讚特首林鄭月娥帶領管治團隊同警隊止暴制亂，表現出非常時期嘅非常勇氣，已經唔使對佢有乜幻想，不過佢似乎想扮吓好人，不斷講乜嘢一家人之間有商有量，唔使用暴力，可惜網民唔多受落，紛紛話冇人想同打到人頭破血流嘅人做一家人！
抄習總講「家和萬事興」
駱惠寧喺致辭話，香港係多元社會，對一啲問題存在不同意見，甚至有重大分歧並唔奇怪，但不能走極端更不能搞暴力，強調一家人之間有商有量，再大嘅事都可解決，佢又提及習近平視察澳門時講「家和萬事興」，仲話自己作為香港呢個家嘅一員，已感受到家人嘅親切，又引用《獅子山下》歌詞「拋開區分求共對」，叫人攜手為香港呢個家打拼奮鬥。
不過好多網民話冇人想同佢做一家人，仲話𠵱家呢個家有家暴，日日俾777同班green objects欺凌，仲打到人頭破血流、見人就又拉又鎖，冇人想同佢哋做家人，駱惠寧仲大讚呢班人，點會有香港人認同！