本土演員、本地賀歲片經典的《家有囍事》由上世紀90年代拍到千禧年第N集，今年《家有囍事2020》繼續上場。片中飾演老千姊妹花的周秀娜及陳靜（DaDa），戲內一文一武培養姊妹情，做妹妹的DaDa一埋位就自動波俾人錫。
統籌、採訪：林妙萍
攝影：周樂恒
34歲的周秀娜和30歲的陳靜上周在影樓拍攝，一見面就開心傾美容質子機，DaDa補妝時周秀娜就吃早餐，相當有默契。兩人在賀歲片《家有囍事2020》演兩姊妹，一個賣身手一個賣身材，周秀娜說：「我嘅角色係比較打得，有乜動作危險就家姐出嚟，妹妹就施展美色，係一柔一剛的配合。」她續說：「我係屋企唯一一個女仔，有阿哥、兩個細佬，由細到大都好想有家姐或妹妹傾女仔嘢，今次係第一次拍戲時有個細妹嘅感覺，姊妹情呢樣嘢DaDa係比較lead到我。」DaDa上有家姐，一埋位慣了自動波匿在周秀娜身後，俾人保護、俾人錫。
親拍動作戲
片中不少動作場面周秀娜親身上陣，一幕性感大露背、包着毛巾去救人，另一場拍完全場拍掌，「替身女仔示範時，跳落地再翻一個觔斗，跟住又再起身、踢一腳完美地轉身，再360度落地。我覺得冇可能，但好想親身做，我盲舂舂去試，一落就撞到個頭，又撞到條頸，再撞到個背部，試咗幾次之後，真正第一個take做完，自己鬆咗一口氣，跟住就聽到側邊啲人、導演喺度拍晒手，嘩，佢哋好surprise咁，嗰吓好有成功感。」
鍾意賀歲片
DaDa一貫負責打扮清涼，刺激男性觀眾眼球，鏡頭前性感在草地做瑜伽，背後餵蚊、暴曬，「對比之下，日日入組見到佢又瘀又傷，其實我係比較舒服。我好鍾意拍賀歲片，人人都開開心心。」《家有囍事》最經典當然要數1992年周星馳、張國榮那齣，「92年我應該都未戒奶，哈哈，翻睇過好多次，對白『金絲雀』、『反轉再反轉』全部都識背，太經典。」
陳靜：30女生搵愛情
「如果呢十年，我自己係有捨有得，勿忘初衷。」事業總算有點小成績，開開心心拍賀歲片，去年《BABY復仇記》 更參展第32屆東京國際電影節。「嗰次有好多來自世界各地嘅電影人一齊，聽我分享，覺得好感動，係一個認同位。」
識搞笑好啲
新一年，30歲女生很想找愛情，戀愛、結婚、生小孩，40歲前一步到位，「今年我有呢個心理準備，去搵一個人，我可以學識點樣去愛佢，而唔係只係佢去愛我。有舒服嘅空間，可以相處吓，可以公開關係嘅。」最近生病狂咳，DaDa收到一位男士送的愛心湯，令她大為感動。「愛情係一瞬間的，但感情要時間經營。希望搵到人品好啲、搞笑嘅，搞笑緊要過靚仔，四正就OK，越講越多㖭，哈哈，唔使好有錢，錢我可以自己搵，但唔可以我養埋佢，佢自己至少要搞掂自己。」
陳靜
化妝、髮型：Louisa
周秀娜：休息雪個卵
2020新開始，周秀娜最想休息放幾個月假，叉完電再拼五年、十年。「我今年想乜都唔做，首先要休息一陣，雪個卵先。唔係講笑，係真㗎，舊年我有plan呢件事：雪卵，想咁樣做，但身體唔容許。醫生直情話我身體好差，可能飲食關係，作息唔正常、唔夠瞓，壓力大呀！」
女星表面風光，背後五勞七傷，停工休息養生，談何容易，「唔得，我今年真係要做，因為時間唔等人。」雪粒卵都難兼顧，找另一半肯定更不易，談到對上一次來自男人的感動位，居然是爸爸。原來周爸爸每日早上都會送周秀娜出門，「我爸爸都幾sweet，每日送我落樓返工，睇住我上車。有次我喺車度整嘢，回覆訊息搞咗好耐，直到我出到紅綠燈口，發覺爹哋仲企喺樓下望住我，我將來都要搵一個咁樣嘅男人。」
開心揀拍戲
時間過得快，過去十年，正是周秀娜人生翻天覆地改變的一個decade ，向前直跑早成為習慣，「我自己通常覺得係，回顧咗一次就算，跟住就向前，將來要做啲乜，仲有乜想做，我覺得要比較珍惜𠵱家。」不會執着對與錯，但決定主攻拍電影，可算十年內best choice ，「由零到𠵱家，至少呢十年入面都開心嘅，無論有冇達到自己想要嗰個成績，一直都係開心嘅。我好記得自己第一部戲、第一次首映，好緊張，所有人都好開心、戥你高興，但自己就黑口黑面，因為好驚、好尷尬，唔想睇自己演出，我仲記得自己着咗紅色，因為喜慶，哈哈哈哈！」
周秀娜
化妝：Circle Cheung of NdnCo.
髮型：Amber Tse of IL Colpo Central
造型：楊慧珊
更多精采時尚內容，盡在 http://add.appledaily.com。