現年32歲嘅港姐張名雅同圈外老公蔡錦豪結婚四年，育有兩歲大仔浚鏗（Mario）同1歲細仔俊軒（Milo），為照顧兩個寶貝仔，張名雅成為全職媽媽。張名雅前晚喺社交網放咗幾張大仔撞腫鼻樑嘅相，佢留言話：「Mario爆缸一秒變曹星如。」
老公笑似中國殭屍
張名雅之後詳細講出事發原因：「過咗幾個月我先鼓起勇氣同大家分享事件嘅經過，有一次同Mario去玩，去到酒店佢當然超興奮，又跑又跳。好啦。見到張大床就仲開心！因為可以喺床度跳。（其實是極度危險的一件事）。」原來張名雅當時見到兒子在床上跳跳扎，已經出聲多次制止：「越叫佢唔好，越跳得興奮，就喺嗰一刻巨響了一聲，Mario狂哭（不是平時的哭法）我從來未聽過佢哭到咁勁。我一望埋去，佢個鼻腫到……見到咁，我眼淚都標埋出來，都唔知可以點幫佢。」
張名雅事發後立即叫咗酒店急救員協助：「急救人員幫Mario嘅傷口消毒，凍敷。點知Mario突然停咗哭。我問救護人員，佢點啊。會唔會整到鼻骨啊？嗰哥哥話如果真係整到鼻骨，佢應該會一直狂哭，因為會劇痛的。第二日立刻返香港帶佢睇咗兩個醫生。𠵱家過咗咁耐鼻樑都有個小小疤痕，我會繼續勤力幫佢搽小童去疤膏。」張名雅仲解釋其中一張相笑得好開心，係因為當時佢老公話Mario鼻樑張膠布睇落好似中國殭屍。
撰文：馮仁昭