民進黨蔡英文喺香港反修例運動下，競選台灣總統時不停大打「香港牌」，結果以破紀錄得票連任，就算反修例運動唔係為佢而生，但都肯定有助攻效用，難怪佢當選後都話相信香港朋友會高興。但似乎成為「攻神」、一手搞出《逃犯條例》修訂風波嘅特首林鄭月娥都唔多高興，一連兩日拒評台灣總統選舉結果。
台灣以至香港唔少評論都話，大選結果同林鄭處理反修例運動的手法有關，咁見到林鄭現身，梗係要問吓佢自覺有冇「攻」勞？但繼前日出席亞洲金融論壇時，拒絕開腔回應台灣選戰結果後，林鄭昨早主持行政會議前，同樣喺被記者問到對於蔡英文連任總統、佢個人有幾大責任時，封口不提。可能怕一開腔，再造成另一場外交風波。