港台《視點31》嘅2019年壓軸一集fake咗好多網民，原本以為有「燒山」蕭若元VS華記正能量楊官華，點知原來只係一人拍一段片，令網民大叫回水，噚日《視點31》喺fb宣傳有黃秋生大戰何君堯，好多網民諗今次應該堅啩！一早開定網等睇大戰，點知最後又係冇秋生哥VS執葉律師睇，不過一切純屬意外，唔關港台事。
「可能上天安排」
噚晚8點相信好多香港人都同八方一樣，坐定定等睇《視點31》黃秋生大戰何君堯，題目仲係警暴問題。不過秋生最終因為外父離世，秋生亦意外切傷手指要縫針，出席唔到節目。係呢度，八方真係要對秋生哥講聲保重。
情況相當突然，八方同事聯絡到秋生，佢聽落憂心忡忡︰「外父入醫院，我煮嘢食切傷手，要去縫針，啱啱去到洗傷口，外父又話危急，我要趕去第二間醫院，𠵱家外父走咗，我等緊縫針，要縫三針，切到好杰，手指公傷咗，手指公代表長輩，切傷時個心都離一離。」，秋生最後話「可能上天安排叫我唔好去」。
秋生非常唔話得，喺醫院門口接受港台記者訪問，簡短講返對7.21睇法，仲叫喺港台門口「迎接」佢嘅一眾阿公阿婆今晚可以早啲收隊瞓覺。講返個節目，變成何君堯獨腳戲，好多網民都話，聽到秋生缺席，其實個節目「已完」，不過主持利君雅都有就7.21，係咁質問何已完，八方見到何已完都兜得好辛苦，當然梗冇秋生哥質佢咁好睇。
李八方
