校友會午餐例會在每年一月例牌講新一年之投資環境，今年請到三位校友發表意見，點知靚女C臨時去咗睇醫生，醫生睇完，立即寫假紙叫佢即時返屋企休息，唔好返工，靚女C唯有留短訊猛講鎖你、鎖你。靚女C係電視財經節目主播出身，後來投身銀行界，不經不覺已升至SVP（資深或高級副總裁），確是後起之秀，佢唔能夠出席，於是下兩位可以有時間講耐啲，首先係私人銀行董事／亞洲策略師H發言，去年校友H在例會叫人買A股ETF，果然中到正，內地滬綜指、深成指、滬深300指數升幅可人，聽完而有行動者，應該賺到三四成回報。今年又點呢，校友H話滬綜指已升逾3,000點，今年升幅不會太大，而且2020年有三低，即（一）利率低，通脹低，全球進入減息、負利息時期，正常情況下，難以有高回報，（二）增長低，不但各國GDP增長率會係低單位數字，普遍在3%以下，連中國都可能要出盡辦法保六（即GDP增長可能低於6%），於是乎企業盈利增長頂多係5%左右，而目前美國標普五百指數嘅PE約在20倍，5%利潤增長早難以支持標普五百指數大升，（三）宏觀可預見性低，即是話在特朗普當權下（亦大有機會連任），灰犀牛與黑天鵝往往突如其來，投資者防不勝防，好可能股市形勢大好之際，國際間忽然出現短暫危機，觸發股市大跌！
因2020年有三低，校友H建議今年要組成一個投資組合，主力係美股，美國TIPS（隨通脹調整債券），配以若干本港內房股、內需股、企業債券及黃金，但不主張買石油股。有乜嘢冧把？對唔住，銀行規矩唔講得，否則會畀合規部將軍！
之後基金經理分析M接棒，分析M並非銀行中人，冇咁多合規限制，可以講吓冧把，不過無謂在此公開咯。分析M話2020年必需注重風險管理，首先買黃金股，對沖時事危機風險，選管理好嘅公司；其次係本地公用股，擁穩定收益；海外收益股（對沖本地經濟負增長），新經濟股（大科技股）求增值；如此組合，可攻可守，晚上睡覺安樂！
最後本來想講地產嘅，但次次出席嘅地產W，今年冇露面，只得作罷。W校友年年唱淡樓市，意見從來不變，不過佢講地產嘅分析技巧及數據，講得好動人，值得學習㗎！之後校友會宣佈因事延期之「一哥帶路遊大館」節目，會在3月20日星期五午後舉行，由李明逵校友做導遊，到中區舊警署（大館）遊覽，黃昏時間到上海總會吃晚飯，由左丁山安排，參加者每人收費600（連晚飯費用）。