梅瑾入宮兩年不到，好嘢，帶同王子王孫不單止搬出肯盛頓宮，也與溫莎皇朝保持大西洋的遠程距離，連太上老君英女王最終肯首，送上祝願；祝你好運，去美洲開枝散葉……潛台詞：反正哈里唔係正印，傳聞並非查里斯血脈而是戴安娜當年搞搞震成果陰魂不散，更無謂俾個血統不純正，唔黑唔白孫新抱搞到白金漢宮變成黑金漢宮，一家便宜兩家着，你哋有咁遠時就去咁遠，送客……
平江不肖生上世紀中期作品《江湖奇俠傳》之〈火燒紅蓮寺〉部份，由邵氏拍成電影《江湖奇俠》；大堆頭，當時得令凌波客串演大慈大悲姑姑，將電影血氣男兒推高成為風氣，獨臂刀王王羽飾桂武，邵氏七玉女最年輕成員，當年力捧新星接班人之一秦萍飾甘聯珠，雖然年齡青黃不接依然萬人迷馮寶寶，日後性格巨星羅烈等等參演，細佬哥嘅我都印象深刻。
戲味濃厚，過完一關又一關，桂武帶着聯珠衝出重圍，阿哥阿嫂（你哋都係早啲走，此處不留人，你哋兩仔爺王位候補人排位已跌至前五以外，都無謂留喺度俾小報媒體比拼妯娌造話柄 ），叔伯嫂母（安德魯王子呢排都自身難保），阿爸阿媽（查理斯大概仍然懷疑此子何來？老過阿嫲嘅後母理得你咁多？），還有慈悲協助嘅姑姑（難道女騎士馬面姑姑安妮公主會幫上一把？），最後去到阿爺阿嫲；最難呢一關，電影裏面一家之主的太君武功至強，把守最後一關，如果唔放人，相信江湖奇俠都唔會有戲（雖然阿爺年紀高，至保守傳統未必不理事，大英帝國一國之君阿嫲呢一關冇咁易過，近年愈來愈隨和一回事，拗掂佢接受王室從來未試過嘅王位前十繼承人，住到新世界咁遠，都咪話唔新鮮，重要係個王孫除咗家族公關，未做過其他工作，放出去隨時變咗個小明星嘅附屬品，予人食軟飯印象，呢口污氣點頂？）
無論如何，梅瑾肯定至聰明，守：已有公爵莊園封地、夫人地位。攻：整個美國、加拿大甚至全世界巿場。都話呢個電視小明星唔簡單，點會安心留守公爵莊園做鄉下婆，仲係明日王后Kate Middleton嘅牛後？抱擁王子與封號大把作為，有朝一日做生意、出書，隨時做埋Oprah接班人，一天光晒，堅持美國獨立精神，威過永遠跟在女王、親王、長王子身後卑躬屈膝！