黃子華自編自導自演賀歲片《乜代宗師》昨晚在尖沙嘴舉行首映禮，主角劉心悠、許紹雄、楊詩敏、陸永及C君等出席造勢。《乜代宗師》拍攝以來波折重重，有指電影本來是英皇投資，但因題材未能取得內地批文遭撤資，最後子華惟有賣樓籌製作費拍攝，因而將拍攝地點改到深圳，亦因此捲入網民近日發起罷睇「紅」戲的名單。
右手手掌骨折
昨晚子華在首映上指，收到不少網民及朋友鼓勵及支持：「都有兩秒淚光，好多朋友好緊張，雖然我賣咗層樓，但我仲有地方住。最緊要部戲好，大家入嚟支持就得。」他又特別多謝心悠答應演拳手，最初找對方是看中她跑馬拉松，但到訓練時才知大鑊：「心悠冇肌肉，最初連半下掌上壓做唔到，咁我就地獄式訓練佢半年，試過跟佢訓練，自己都嘔白泡，因為要練大隻，先要谷肥佢，大家都驚佢返唔到轉頭，之後又要佢節食戒鹽，折磨咗佢半年。佢真係好黐線，拍完半年佢仲繼續訓練。」
昨晚子華包紮右手手掌，原來是拍戲骨折，不過已逐漸康復。他表示今次做導演好辛苦：「有時嗌咗action，自己都唔記得埋位，部戲好多波折，香港局勢又唔同咗，都有開會諗繼唔繼續。」但他否認最初是英皇投資：「呢部一直係我投資，同英皇合作係另一部。」他表示因很多演員及監製沒有收錢，所以希望賺錢後可分給眾人。說到今次投資超過八位數字，是有史以來投資最高的港產片。對於網民的批評，子華說：「政治可以摧毀亦可以幫助，但都唔值得高興。」
心悠想打擂台
心悠聽到子華心痛她「打到殘晒」，回憶當時情況不禁落淚，更持續喊了十分鐘，她說：「之前受傷打石膏都繼續拍，傷咗左手用右手，傷咗右腳用左腳。」她補充表示訓練時好大壓力：「最初由一下掌上壓都做唔到，到𠵱家分開做到100下，好想打擂台，尤其想打敗訓練我嘅老師。」C君說在戲中被心悠打得很「應」，最開心是第一次做電影配樂。
採訪：張明
攝影：陳俊強