廖碧兒近年事業順利，但愛情卻未有着落，她坦言過去幾段感情沒令自己受傷，反而學懂與人相處。自小由婆婆照顧，兩婆孫種菜、搣蒜頭，簡單生活已令她最開心，反擊外間指「拜金」，不過最令她受打擊是腰傷之苦，令她體會到家人及健康才是最重要。
撰文：羅慧敏
攝影：林德雄
現年41歲的廖碧兒，19歲參加華裔小姐，由選美轉到演戲，再涉足紅酒事業、餐飲生意，事事如意，感情卻落空，她坦言渴望結婚生小孩：「其實都想，但冇得強求，要有啱嘅partner，溝通到先，我冇乜時間搵，佢哋會搵我。」
「愛情冇話啱定錯」
現時廖碧兒懂得享受人生，對感情也看得淡：「無論感情同愛情，都係過程同經驗，雖然未必係好，冇話啱定錯，𠵱家會聽多啲，講說話小心啲，呢個係成長過程。」問到最傷是哪段情？她笑說：「得幾個咋，其實我唔覺得係hurt，感情教咗我好多嘢，我覺得唔需要用時間去了解一個人，因為人嘅性格係唔會變，你第一個感覺就應該係中，如果嗰個人對你好，一日裏面佢會好留意你同記得你嘅嘢，睇吓你肯唔肯接受，可能一識就好夾，大家就到大家就最perfect。」
多年來經常被扯到「拜金」，廖碧兒說：「好好彩細個有婆婆栽培、照顧，喺屋企後面種菜，我哋自己種嚟食，最簡單嘅生活最開心，我有過咁嘅生活，同婆婆用手搣蒜頭。話我乜拜金，佢有冇真係坐喺我隔籬？啲人識得話人唔識得話自己，大家見到嘅先係最好，大家都見到我係點樣出道，投資買樓由邊度買到邊度都知，咁多年我都照顧得我屋企好好，爸爸媽媽都叫我唔使理人點講。」
廖碧兒揚言負面新聞不會打倒她，但最大打擊卻是腳傷導致腰椎骨裂，需要休養三個月，熱愛跳舞的她以為不能繼續夢想，當時是人生最脆弱的時候。
「錢永遠都賺得到」
康復後廖碧兒決定重新大洗牌，她說：「工作還工作，唔係金錢畀到你身份，錢永遠都賺得到，人格先係屬於我自己，屋企人同健康係最重要。」去年拍了四部劇集，但她又在加拿大讀工商管理課程：「我唔可以停落嚟，一停就病，或者諗吓讀品酒4級同master。」
化妝：Ivan Lee
髮型：Chris Cheng of iL COLPO Platinum
場地提供：McSorley's Brewhouse & Grill