建制派區議會選舉大敗，但當中至少有一個人輸得起，就係建制派中罕有反對硬推《逃犯條例》修訂嘅實政圓桌田北辰。田二少喺區選不敵政治大氣候，失落荃灣議席，但不單冇因為輸而放棄落區，新年流流仲自嘲「『書』得起」。
佢噚日着晒新年裝去荃灣公園參觀「喜動圖書館」，對架圖書車讚不絕口，皆因親身試驗後發現，車上除咗有300本館藏、200本後備書籍，更重要係有兩部電子圖書機，大家下載「HyRead 3」程式，再用公共圖書證登入，就可以用到約有16,000本館藏嘅線上圖書館，喺電話都可以睇到書。
而喺反修例風波中同娥特唔係同一陣線嘅佢，更加搵到位入批娥特政府。田二少話李嘉誠派錢，60日內就派晒10億畀中小企應急，皆因人哋識電子化，相反政府部門嘅做法就真係無眼睇，強調民生嘢必須要電子化，先係真正服務市民。唉，如果政府咁貼地，就唔會搞到今時今日咁田地啦。