周日喺沙地舉行嘅西班牙超級盃決賽，皇家馬德里同馬德里體育會經過120分鐘激戰後踢成0:0，最終得番10人應戰嘅皇馬互射12碼後以4:1贏咗馬體會。
今場決賽兩軍有唔少攻勢，不過都把握唔到，結果兩隊踢足90分鐘都冇波入要打加時。加時嗰陣入波就冇啦，紅牌就有張，華維迪喺115分鐘從後踢跌單刀嘅莫拉達而被逐。最後兩隊悶和收場，要互射12碼分勝負。馬體會頭三輪只有捷比亞射入，結果由四輪全中嘅皇馬贏4:1，第11次捧走西超盃，呢個冠軍亦都係施丹上年三月重返皇馬領軍以嚟第一次贏嘅錦標。值得留意嘅係，呢位功勳教頭連同第一次執教皇馬嗰陣，領軍九次踢決賽，從來都未輸過，當中包括三屆歐聯決賽。