特區政府近期最忙嘅相信係公務員事務局局長羅智光同教育局局長楊潤雄，中央要求各部門全力「止暴制亂」，公務員係被清算焦點。羅智光同楊潤雄喺聖旨下都不敢怠慢頻交功課，至今31個因反修例被捕嘅公務員被停職，教師甚至校長則被警告隨時被DQ。
特首林鄭月娥周日晚出稿就為兩位清算局長叫陣，話會支持佢哋堅定立場協助止暴制亂，唔知係咪驚兩位局長受壓而退縮啦，林鄭聲言會對「害群之馬」絕不手軟，卻令網民好大反彈，皆因警隊都有唔少害群之犬，呢筆賬點解林鄭又唔去算？
見完駱惠寧轉守為攻
近日大規模嘅業界掃黃清算行動，令到羅智光同楊潤雄兩位局長受到唔少批評同壓力，最新民調更顯示兩人支持度淨值顯著下跌。就喺兩位政府清算師受壓之時，特首林鄭月娥出場嘞，佢前晚深夜喺facebook發帖指兩位局長話嚴肅跟進違規公務員同教師後，有政客立即挺身而出批評政府秋後算賬同打壓等，林鄭強調絕大多數公務員同教師謹守崗位，但同時表明對當中嘅害群之馬，「我們亦不會手軟」，強調要撥亂反正，否則違法違規行為會變本加厲，令兩界別蒙羞喎。
林鄭最後一句表明，「我支持兩位局長以堅定立場履行官員全力協助止暴制亂的責任」。林鄭特別用上「堅定立場」四粒字，唔知係咪驚兩局長受壓而退縮？但肯定嘅係愛作戰嘅林鄭，見完西環新領導駱惠寧後信心返晒嚟嘞，相信喺反修例運動開始退潮下，特區政府或會轉守為攻，與西環行埋「進一步推進止暴制亂」，唔再任民主派魚肉，有政界叫大家留意星期四嘅立法會特首答問大會，睇吓林鄭會否回復當年勇。
識睇睇留言
Jessie Yu：黑警入面咁多害群之馬又唔見你去撥亂反正
Alex Kwok：林鄭問責下台，成立獨立調查委員會，重建公義社會，才是真正撥亂反正
Philip Chiu：在今次反送中修例事件中，是誰首先提出，是誰堅拒撤回？害群之馬是誰，香港人都睇得清清楚楚
Wai Man：有一天全港市民會再次企出嚟叫你落台，我們也不會手軟
資料來源：《蘋果》網頁留言
李八方