【黑鏡線索】
前排終於睇咗HBO拍嘅《Chernobyl》，單季六集，重演被稱為人類史上最大核災難，蘇聯共產帝國治下，切爾諾貝爾核電廠大爆炸嘅前因後果。
第一幕，講有個科學家，匿喺屋企錄音，錄完一餅又一餅，之後將錄音帶收埋喺隱蔽位置，然後吊頸自殺。之後鏡頭一轉，由兩年前爆炸嗰一刻核電廠裏面嘅情況開始講起。成套劇最大疑團，係到底點解會爆炸？戲入面好多角色都曾經提到，核電廠設計，好正路咁，係有個緊急掣，就算發生任何問題，諗唔掂，大不了㩒個緊急掣，成個爐就會煞停，原理好簡單，科學好硬淨，絕對冇可能會搞到爆炸。
廠方欺下瞞上 貫徹列寧共產
咁當然就真係搞到爆炸。而謎底都係嗰啲：人禍。原來個核電廠起嘅時候，出現延誤，但係為咗達標，於是未做晒測試就拎嚟用，諗住之後再後補個測試，點知補咗三年都未順利完成到個測試。直到一日負責人為咗升官，於是逼下屬喺應該叫停嘅情況下，夾硬繼續測試，結果失控。
就算係咁，照計都可以出最後絕招㩒緊急掣。但一㩒，反而爆炸咗。原來係為咗慳錢，個緊急掣喺設計上行咗捷徑，於是喺某啲極端情況下會引起爆炸，而嗰次測試就係去到呢個極端情況。呢個漏洞，有科學家出文警告過，結果個科學家被消失，份檔案就被列為國家機密，連核電廠負責人都呃埋，完全唔知乜事。
爆炸咗，廠方第一時間，係大事化小，欺下瞞上。例如爆炸後跟程序要量度輻射水平，攞咗個低級版測量器，個測量器最高只能夠顯示出360度，於是就向黨上級報360度，一層一層咁傳上去，一直到最高領導人戈爾巴喬夫，結論係360度，唔完美，但可以接受，唔係好大件事。直到後來用高級版測量器一度，結果，係超過三萬度。
貫穿全劇，就係呢個列寧共產，「偉大的黨永遠是對的」嘅氛圍。黨嘅權威最重要，真相係最大嘅敵人。一個大話，又要搵另外一個大話嚟冚。設計有問題，冚，結果爆炸。爆炸咗，冚，話係火燭。直到其他國家都度到輻射，冇得冚，惟有認，但又唔想人知爆炸係設計造成，於是又冚，話係人為㩒錯掣，搵人食死貓。咁其他幾十個有同一設計漏洞嘅核電廠點處理？當然係扮冇事，唔通走去即刻停用改過咩。
於是，明明可以避免嘅人禍，必然不停出現，只係時間問題。即有如沙士類病毒爆發，係人禍，唔係天災。由飲食文化，到衞生水平，到通報機制，全部都係人為問題。03沙士，話香港係源頭，中國好心出手相救先捱得過，咁都講得出？當然得。唔使幾耐，官方版本，就會話香港人食果子狸蝙蝠出事，傳到去武漢，又要靠中國打救。
睇緊《Chernobyl》，好難唔諗起一步之遙嘅大亞灣核電廠。同中国為鄰，呢個係地緣現實，香港人改變唔到。中国文化，中国價值觀，香港人都係改變唔到。但最低限度，香港要用最高嘅戒備，時時刻刻，提防鄰国輸出瘟疫、輸出核災、輸出極權。咁特區政府做啲乜？當然係維護黨嘅權威，係咁幫武漢辯護，驚死踩親條尾。
政權淪白手套 議會寸土必爭
特區政權民望低到入健力士，因為連藍絲都知，傀儡政權根本唔會保護香港人，甚至係輸入中國問題嘅白手套。光復香港，最基本，係要有一個代表香港人利益嘅政府，必要時會大聲say NO to China，做返足中港區隔，落實兩制。
喺議會戰線，區選結果已經示範咗政權一直行之有效嘅選舉操控，佢嘅buffer去到極端情況，都可以潰敗。嚟緊立法會，無論直選，無論功能組別，一人N步，寸土必爭。
撰文：宋漢生
fb : sunghsblog