現年64歲的蘇施黃在商台三入三出，前後做足41年，去年大除夕圓滿結束電台生涯。今次離開，阿蘇直言不會返轉頭，她說：「唔會唔捨得，向前望，唔好向後望，向後望有鬼！」她準備轉做SOL（Star Opinion Leader）拍自家節目，一腳踢準備器材。
蘇施黃在商台前後做足41年，早前她在商台接受《蘋果》訪問，坦言今次離開後沒有機會再返電台：「真係同電台講拜拜，今次真係行出去唔會行返嚟，唔會唔捨得，向前望，唔好向後望，向後望有鬼，哈哈！」離開商台後，阿蘇轉拍自家網上節目《教煮蘇》，她說：「俞琤話大個啦，從2020年開始，唔好再鬧人，你應該讚，好嘅話畀人知，唔好嘅不屑講，我好同意，我覺得鬧嘅過去60年鬧晒，2020開始改方式面對人生。」60多歲才從頭學起的阿蘇，由買咪、買腳架都一腳踢，「唔識要慢慢摸，一個俾人服侍慣嘅人，好難，呢啲唔慣。」
接哥哥胞姊投訴
向來直腸直肚的阿蘇多年來經常被投訴，連哥哥張國榮的胞姊張綠萍都投訴過她，阿蘇說：「張綠萍投訴我喺節目講『鬼佬』，佢寫信畀何佐芝先生，話蘇施黃非常之冇禮貌，叫外籍人士做鬼佬。」幸好當時老闆何佐芝明白和理解，還跟她說：「我都會咁講㗎，阿蘇！」這句話令她多年來也心存感激。經常鬧聽眾又cut線，連拍檔都「冇面畀」，阿蘇也自認「好惡」，更「投訴」商台，指商台當年為了將music library改成903 workshop，丟掉了所有舊唱片，她說：「嗰啲冇可能再搵到嘅黑膠碟，有啲歌可能好重要，其實幾可笑，我屋企啲CD可能仲多過商台。」
阿蘇在商台任職最後一日的節目上，憶起故友張國榮：「喺商台做節目喊，有個好特別經驗。每日返電台去CEO度借佢間房，喊到收唔到聲，着紅燈（on air），若無其事歡樂一番做節目。」最後阿蘇在節目中送上「六啤半」曾路得的歌《願》，祝願香港平安、開心。
撰文：余燕儀
攝影：陳俊強