參加午餐例會，聽校友講2020年投資大勢，還未開席，講者之一基金經理M突然問左丁山：「喂，師兄，仲未見你寫團年日子、開工吉日呢，寫吓都好噃，阿媽問我呀。」料不到有此一問，唯有答：「睇通勝啦！」點知後來又收到記者小G短訊：「阿媽問幾時團年好喎？」
呢啲擇日、擇時以往幾年係問開傅會長嘅，但傅會長已退隱唔再講，左丁山咪搵本通勝（永經堂版）望吓囉。一睇，團年之日有1月12日（昨日），係甲寅除日，除就係除舊之意，吉日也，一年到尾，在除日除去成年之不好嘢，一家人吃餐團年飯，啱晒，不過此文在13日見報，已經過咗。今晚團年得唔得呢，都唔錯，今日1月13日係乙卯寅日，事事皆宜，吉時在戌時（七至九），正是晚飯時間，趕得切訂位，可以今晚團年。
太急喎，約到大佬，搵唔到細妹，咁又點？過年快到，一個好日子就係1月19日星期日，辛酉成日，事事皆成，年尾就係收成日子，收齊花紅好過年，吉時在午時，還好晚飯時間之戌時亥時雖非大吉時，而是「中」，都唔錯嘞，不必事事求完美。
開年又如何：庚子年年初一在1月25日，係丁卯滿日，中中地，最好在午時吉時（11至1）向家中長輩請安，互相拜年，午時出行向正西可迎財神，西北方迎貴神，新年上香宜在子丑寅時，行完年宵花市返到屋企就差不多係子夜後，正好上香祈福。開年揀年初四執日，宜祭祀祈福，午時一家人齊集吃飯，啱啱好。
新年假期在1月29日年初五結束，是日要返工，但此日係辛未日破日，常人在破日返工，恐怕一事無成，但政府一定在年初五開工，適逢破日，幾驚吓，是否意味庚子鼠年嘅政府公僕，事事不順呢？林鄭係天主教徒，一於百無禁忌，雖則呢位教徒常與港區主教唔對嘴形。常人開工如有得揀，就要避開啦，1月30日星期四係危日，宜開市交易，最好七點就出門返工。左丁山就揀1月31日星期五成日開工，又係最好在七時後出門。
講咁多嘢，又會畀人鬧迷信，點講都好啦，平時唔講吉唔吉時，農曆年期間都係要意頭行先嘅，去年鄉議局在年初二早上凶時拜車公，求到一支第86中籤，「石田為業喜非常，畫餅將來未見香；怎曉田耕耘不得，那知餅食不充腸」，意思係在石地種米，依家大家知道點解咯噃，就係林鄭特首在己亥年初就急不及待推出「送中條例」，遭受廣大市民反對，林鄭明知，偏要在石地種米，結果徒勞無功不特已，還要洩盡香港人氣財氣。庚子年年初二並非吉日，只宜修飾垣牆，早上九時已經係凶時，希望鄉議局等到午時先至求籤。一般市民會在年初三拜車公，午時，申時最好。