國際米蘭上星期六憑門將漢丹諾域喺比賽尾段勇救12碼，力保同到訪嘅阿特蘭大賽和1:1。拉素同日則憑恩莫比尼喺82分鐘一箭定江山，主場以1:0小勝拿玻里，拎到隊史最長嘅意甲10連勝。
主場嘅國際開波四分鐘即由拿達路馬天尼斯接應盧卡古傳送破網。落後嘅阿特蘭大要踢到75分鐘先由魯賓高辛斯入波追成1:1。不過，阿特蘭大嘅馬利路夫斯基87分鐘喺禁區俾巴斯東尼侵犯獲12碼，原本有機會後來居上，但路爾斯梅利爾主射12碼俾國際門將漢丹諾域撲出，最終雙方賽和1:1，各得一分。
國際家陣19戰得46分，至於上星期六全取3分嘅拉素18戰得42分排第3，阿特蘭大19戰得35分續居聯賽榜第5位。