政府一日唔回應反修例人士提出嘅五大訴求，肯定持續都會變成過街老鼠，出席活動唔被柴台都偷笑。噚日舉行嘅香港街馬係持續七個月嘅逆權運動爆發以嚟首個大型運動項目，由政務司司長張建宗擔任主禮嘉賓。一如所料，佢致辭時被部份跑手報以噓聲，亦有唔少跑手black bloc現身，高叫「五大訴求，缺一不可」口號。有跑手經過主禮台時，更舉起抗爭手勢同標語，高喊「香港人加油」，有線新聞仲影到有人疑似以水樽內嘅水噴向張建宗方向，鏡頭所見，張更一度用手抹頭同整理風褸，都咪話唔狼狽。
反修例下嘅街馬，唔少跑手都以衣飾明志。有選手以黑布蒙面，亦有跑手戴上眼罩同防毒面具跑步，更有選手創新化做人肉「連儂牆」，身上貼有大量memo紙。
頭頂中招 致辭被噓爆
Black bloc嘅人真係唔少，有啲仲貼上「光復香港，時代革命」標語，又將參賽號碼遮蓋，改為貼上「popo也沒有no.」標語，諷刺防暴警喺示威期間執勤都冇展示警員編號。
其實到場擔任主禮嘅張建宗，似乎都想扮作一切如常，佢致辭時話希望透過運動賽事，增加社會嘅正能量，指港府上年度喺《施政報告》中，提出將60個體育總會嘅資助總額增加至超過五億，又話未來會投放更多資源培訓香港精英運動員，仲感謝主辦單位上下一心，令街馬能喺現時咁嘅環境下舉行，只係呢，佢嘅一片好心就換嚟唔少跑手嘅噓聲，見到在場唔少跑手black bloc，已經知道反修例嘅民意仍然持續，有跑手高叫抗爭口號，亦有跑手舉起五指手勢同叫口號。
而跑手開始起步後，張建宗一直企喺台上，喺有線新聞拍到嘅片段仲見到突然有水從由下方射出，張建宗被濺中頭頂，隨即用手抹頭同整理風褸。
有連續五年參加街馬嘅跑手話呀，都擔心過今年賽事會因社會事件而取消，最終可以如常舉行都好開心，希望可以喺三小時內完成賽事。而今年街馬5點15分喺東區走廊起跑，入東隧過海，經油塘、觀塘碼頭，並以新山道土瓜灣遊樂場為終點，全長32.195公里，主辦單位喺賽道沿途補給站設特色小食，包括一口鮑魚同芒果糯米飯等。
李八方
