闊別AC米蘭七年半後回歸嘅伊巴謙莫域，上星期六意甲以一腳妙射「開齋」，幫球隊作客以2:0戰勝卡利亞里。賽後38歲佢叫各位期待吓佢喺主場聖西路球場嘅「神」慶祝。
38歲高齡踢足全場
伊巴喺上星期對森多利亞後備上陣無乜表現，不過今場正選上陣即刻有貨交。佢上半場曾經有球窄角度頭槌攻門，可惜頂中柱。好彩球隊喺換邊後僅34秒，先有拉菲爾利亞奧開記錄，之後迪奧靴南迪斯左路短傳入禁區，伊巴拉弓燙射入網，射入回歸後首個入球。原本伊巴今場可以梅開二度，下半場尾段佢接應傳中瞓身飛頂入網，可惜越位在先，但亦無阻球隊兩球淨勝對手，結束咗聯賽三場不勝嘅頹勢。
回歸第二場就開齋嘅伊巴，今場以38歲100日成為意甲史上第5老嘅入球者，賽後仲大爆半場曾經俾教練皮奧利問使唔使換出休息，不過最終佢踢足全場：「教練覺得我可能需要休息。不過我冇問題，身體亦跟得上。」記者又問佢狀態咁好會唔會同米蘭續約，伊巴就搞笑咁答：「我要幫米蘭贏意甲先有得自動續約㗎！」
隊友當伊巴神咁拜
今場伊巴作客入波後，霸氣十足咁舉高雙手慶祝，佢就叫大家期待吓佢返主場聖西路球場入波：「我如果喺聖西路入波，我會好似神咁慶祝。好似上帝咁慶祝會令我活力十足。」不過，相信帶領球隊重回勝軌嘅伊巴，經已俾隊友當神咁拜，今場助攻畀伊巴嘅迪奧靴南迪斯，賽後就喺社交媒體發文向伊巴致敬：「感謝神幫我哋贏波，要一路贏落去！」米蘭未來兩場比賽都喺主場踢，分別係意大利盃對史帕爾，同意甲對烏甸尼斯，兩場對手實力唔算好勁，到時好有機會睇睇伊巴點樣好似神咁慶祝。
