【姐匙Talk】阿勝搞事遭日本禁入境

【姐匙Talk】阿勝搞事遭日本禁入境

影星「一條褲」一向係好花心,年紀唔細,但依然四圍識女仔,𠵱家幾乎長住內地嘅佢,因為老婆要睇住個仔,唔可以成日陪住喺身邊,不過講真對一條褲嚟講,佢都唔想老婆成日喺度,就算老婆已經對佢喺出邊花天酒地嘅事,一直隻眼開隻眼閉,但始終有個人喺度都係冇咁free。

至於一條褲個仔「阿勝」自從喺內地搞事後,已經冇乜再留喺當地生活,寧願周圍住吓。不過有一件事係令阿勝好傷心,因為佢最鍾意日本,但𠵱家冇得去,原來係因為佢喺內地生事,日本唔再俾阿勝入境,所以佢對自己以前做過嘅錯事好後悔,如果知係會有咁嘅結果,佢一定唔會犯錯。

雖然好多人都想幫阿勝,想為佢搞番掂,但因為佢之前做錯事,唔係咁簡單,日本有自己國策,所以阿勝都冇辦法,佢同朋友講起呢件事,真係講到喊咗出嚟,因為佢真係好鍾意日本,之前仲諗住大部份時間留喺嗰邊,加上佢喺嗰邊又多朋友,以前幾乎每個月都去一、兩次,有錢喺日本生活又多朋友,真係想點玩都可以,不過𠵱家已經冇呢個機會。

撰文:Jessie

姐匙Talk

我姐匙縱橫歌影視幕後,多年嚟冷眼旁觀,娛樂圈大小事都走唔過我雙眼,歡迎大家嚟剝花生。