周永恒回來了。他說：「好似唔同晒，同我早幾年認識嘅香港唔同晒！發覺個狀況係唔認識嘅地方！」
他消失近五年時間，去了內地發展，2018年娶了在廣州居住的老婆，奉子成婚，兒子一歲多了。周永恒說，由去年6月至今的抗爭，是一場正邪大戰，「好似係正邪大戰、黑白大戰！你揀既得利益者，即係揸住資源喺手嗰啲，你就要去舔佢，你就要放棄新嘅一代！」
今天警暴，他當年家暴。他說五年前毀了自己（和阿Yu趙頌茹）的一頭家，香港更也是他的家。「唔使受呀？要找數㗎！你見到我嗰幾年過得幾大鑊㗎啦，唔使找數呀？係賤就俾人鬧㗎啦，細個都教，有錯就要認，打就要企定，𠵱家（香港）點呀？」
不如重新開始。他拾起結他在街頭busking，在天水圍屋企樓下唱歌，元旦那天遇上老婆婆送他一個麵包，「咦，原來一個麵包，代表咗一啲我搵咗好耐都搵唔到嘅嘢。我搵到人民幣呀，但係我搵唔到麵包！」
撰文：文嘉龍
攝影：陳慧安
我𠵱家都好勇武啦
香港的逆權運動，周永恒說是正邪黑白大戰；他的家更是藍（父母）紅（老婆）雲集。他和父親爭拗過無數次，仍然改變不了藍底想法，但他卻將內地老婆由紅轉黃，成功爭取。
周永恒說了兩件事。第一件是關於他在中環開髮型屋的父親，「我阿爸讀書唔多，佢覺得影響咗佢啲生意，啲客少咗，的而且確屋企係拮据嘅個狀況，但係有一日我忍唔到，睇咗新聞嗰日係開槍（10月1日），𡃁仔已經『啪』中咗，佢話應該打死佢，我話你都黐線嘅，𠵱家做乜嘢啫，佢做錯咗啲乜要打死佢，（如果）打死咗我呢，你個仔都係憤世㗎，你畀我年輕力壯我勇武到不得了啦，我𠵱家都好勇武啦個狀態，忍唔到㗎！我堅同佢嘈，喺政見狀況入面，嘈到斷絕關係囉，實際我係好愛我阿爸，我阿爸都好愛我，正正就係一個縮影，香港有好多家庭係撕裂得好緊要，嘩，原來啲錢對佢嚟講係好緊要囉！」
第二件就是他的內地老婆陳薇由紅變黃的故事。「佢本身完全係政治冷感，就算唔係政治冷感，佢哋（內地人）都冇（政治意識），有，你唔理，就叫做有冷有熱啫，冇熱嘅嗰個地方（內地），又何來有冷？所以唔可以話佢哋係政治冷感，直頭係冇，係空㗎呢部份！」
轉捩點是7.21，「成日去supermarket就係去嗰個站落車（元朗），基本上佢（老婆）日日都過去，早咗一班車返嚟只係，嗰日佢開始發現個問題，燒到埋身吖嘛，開始進入到我哋個社區喎！你平時去嗰間supermarket嘅嗰個站，佢開始會諗，自己推住個仔（BB車）會遇見呢啲嘢，佢就會諗，咦，40分鐘都未到（元朗冇警時分），大陸都唔係咁喎，好恐怖囉成件事，咁佢見到咪驚囉，佢驚，我咪開始解釋畀佢聽，香港係點樣三權分立，乜叫法治，司法獨立，立法，執法，跟住互相抗衡，即係我哋呢啲平民百姓大家望住，件事就好均真喇！咁咪慢慢，哦，原來係咁㗎，我咪話返佢聽，咁乜係人治呀……」
周永恒說，他知道甚麼是公義，「我哋其實係好渺小，我哋全部都係地球人，喺呢個狀況底下，我哋揀返公義囉，就係咁簡單！阿仔（一歲多兒子周聖恩）好耐冇出街啦，一街都係啲『杏仁』味，又驚啦，唔想出街，聖誕節、元旦，出去？唔出啦！」
做錯咗咪去承擔囉
四年多前，周永恒跑到深圳發展，「最開頭我係去咗北京考健身牌，然後去澳洲讀咗啲營養學，跟住去深圳同我細佬搞咗個瑜伽健身館，我諗搞咗一年至年半，我哋都退咗股，之後我細佬去咗上海，又再開（教瑜伽），跟住我又去上海，我stay唔到喺嗰度，我就跳來跳去，我去咗廣州做廣告創作，做返啲音樂製作嘅嘢！」
他在內地光怪陸離無奇不有，不重視合約精神、沒有版權概念，錢，是賺到，但面對內地的人事物，心力交瘁，「啲奶粉又唔得，打針又唔得，你返去做乜？淨係返嚟香港買嘢，買完返去搵錢返嚟唱（兌換），唱完又唔想唱返去使！我就開始喺呢段時間去諗，不如唔好再做冇腳嘅雀仔，之前自己做錯啲乜，做錯咪去承擔囉，唔好再去逃避，俾人鬧咪俾人鬧，呢度始終係我屋企，我寧願有返個根囉！你唔明㗎喇，你去一個唔屬於你嘅地方，你係搵到錢，你又唔想喺嗰度消費，因為嗰度唔係你屋企，然後，你又好想返番嚟，點都好，我覺得呢個地方（香港）需要我多啲，唔係呢個地方有冇錢搵！」
有錯就認，周永恒是認錯專家。2014年他被爆婚外情偷食小三劉依靜（Ruby），又發生家暴事件，事後聲淚俱下認人渣，最終離婚收場，兩個女撫養權歸前妻趙頌茹。問他做過最錯的事，周永恒說：「最錯？推阿Yu囉，推咗佢一下，好大力（阿Yu被推倒地致臉部受傷要入院縫六針）！好似啲壓力煲，一個大話冚一個大話，𠵱家我諗返，如果我繼續做落去會點呢，好邪惡喎，勁多女人，佢（趙）又唔出聲，幾頭家咁，係咪咁先叫成功呀？應該唔係囉，我𠵱家話畀大家聽，唔係囉！」
上月中周永恒在尖沙嘴街頭疑與人爭執出手，被警方拘捕，更有他在街頭跪拜警察的畫面。周永恒說，那天是他被人打，「啲警察係咁叫我冷靜，我話阿Sir我俾人打喎，佢係咁行埋嚟越行越近，又好似想圍埋嚟，我咪坐喺地下囉，你知啦，因為佢逼埋嚟話你唔冷靜，屈我隻手點算呀？我最佳嘅方法就係坐喺地下，擺好咗（電話）自拍囉，佢好想搶我電話，我唔知點解佢唔畀我影，我保護自己，佢話你要熄咗個電話，我話我有權影，我驚！」到警署後，他被安排在「臭格」（羈留室）。
「喺個『臭格』度我諗咗一晚，我祈咗個禱，第一樣嘢，畀返兩個女同我有關係，我唔知點樣可以做到，係咪搵到錢就得呢？唔係喎，我係一個乜嘢人，佢哋先至OK呢？」冇見兩個女幾耐？「好長好長好長嘅時間，唔願意去講佢哋呀其實我暫時，嗰個都仲喺個禱告入面；第二樣嘢就係，我希望同屋企人嘅關係可以修補返，我35歲喇，無論啱唔啱都好啦，我老竇佢乜顏色都好啦，佢都係要嚟保釋我。我喺度諗，如果我個仔35歲，都仲要我去保釋，我會好擔心，我見到佢（兒子）咁似我，我望住佢好似塊鏡，我唔想佢做啲嘢，我自己都要唔好做！」
我本身都已經cheap咗
周永恒要打聽愛女的消息，是靠Google，「我知道信希（大女兒）拉Cello好叻囉，佢成日都會去表演！Google好偉大㗎嘛，搜佢個名，知道佢12月15號喺高山劇場原來有個群演，但係我check緊嗰時係16號，miss咗一日！有問阿Yu嘅，問佢會唔會（之後）有得畀我可以去偷偷睇吓，咁啱嗰段新聞又出咗，話我飲醉酒發生事情嗰段新聞，佢就話你又出呢啲咁嘅新聞，兩個女都唔想見你呀！我其實係好傷心嘅，因為我留喺度（香港）有好大嘅原因，係我想保護佢哋。我大女10歲喇，你睇啲新聞全部都係啲𡃁仔，（得）13歲，冇咁快完呢場仗㗎，我好擔心！」
要打呢場仗，他希望自己可以站起來，在街頭重新出發。「攞住個結他，喺唔同嘅地方，喺條街度，唱返歌畀香港人聽先，尤其是唱返畀年輕人聽！你知𠵱家啲演唱會開唔到㗎嘛，保險又買唔到，啲大嗰啲（星）出嚟又好似跌晒價，覺得自己喺條街度cheap咗，我啱晒啦，我本身都已經cheap咗，咁我咪由頭嚟過囉，我可以喺呢度由頭嚟過，用返我自己想用嘅武器，去做返自己應該去做嘅一場仗返嚟！」
周永恒為這場抗爭運動寫了三首歌，曲詞包辦，重拾唱歌的初心，「我『發夢』啲畫面嚟嘅……有啲人就蒙面做壞事唔使受制裁啦，唔知佢係邊個，但係我哋出嚟蒙住塊面係為乜？係付出緊喎，係犧牲緊喎，喺犧牲嘅狀況下都仲蒙住塊面去犧牲，煲底先見，係一個無我嘅一種犧牲狀況！我睇返佢哋嘅夢想，佢哋嘅爭取，佢哋嘅團結，佢哋嘅犧牲，inspire返我。雖然我都係一齊喺度行緊，但係我收到喎，收到晒，鼓勵埋自己，唔係喺度齋集氣，我係喺度被醫治緊！」
留港抗爭，與老婆齊上齊落，「我今次唔係我自己一個返嚟，我帶咗一個嗰邊（內地）嘅人返嚟喎，佢𠵱家好支持我㗎，佢甚至乎唔驚，我話，喂，你返到去（內地）會唔會好麻煩，你都要續證，佢都唔理喇直頭，我覺得佢好型呀！我都唔驚，我咪照返去囉，如果有一日真係扣（查）我，全世界都見到啦，如果真係咁樣嘅話，咪證實晒畀全部人睇囉，惟有係咁，邊有得避啫，冇得避㗎呢件事，因為我哋𠵱家光明正大！」
這幾年間，周永恒說總算「搵返自己」，「起碼認（錯）先啦，未必一定即刻改到，但起碼畀啲時間，你認咗咁你咪摺埋囉，我摺埋我自己㗎，自己收皮囉，去第二度搵返自己先，唔好出嚟獻世阻住人，好過你有錯又唔認，喺度繼續咁樣好乞人憎㗎嘛！我自己都feel過自己乞人憎嗰個狀態啦！」
驚唔驚自己又重複做錯？「我老咗咁多，冇咗好多火，以前啲火，我諗我𠵱家少咗好多！」
【後記】世代之爭
訪問期間，周永恒拿起結他唱出了他寫下的三首歌，其中一首，還未有歌名的，是關於衝衝子與和理非的，「……和你飛天遁地 不揀陣地 不需預備 想起你珍惜你 曾並肩闖絕地 犧牲預備 就是那 可感慨可悲憤可相信我還認得『你』」
周永恒說，「𠵱家十幾歲嗰啲唔識我呀，知，但係唔知咁多嘢，阿Yu嗰單嘢五年前，佢哋都未出毛，我細個出道（2001年），佢哋未出世㖭啦！」
在黃店訪問的現場，剛巧有兩位年輕人，一個19、一個18，還說：「呢個係咪Kenny（關智斌）？」對他們說他是周永恒，剛唱的歌是為運動而作的。「我聽到，一聽就知『黃』！佢有冇Ig呀？」
場地提供：1963木十豆寸
