今屆西超盃移師沙地阿拉伯上演兼改制為四隊踢淘汰賽，西班牙足總原本想令呢項賽事更具競爭力，從中再撈一筆，但似乎如意算盤打唔響，門票銷售情況唔多理想。皇家馬德里日前就率先大勝華倫西亞入決賽，如果巴塞隆拿周四淘汰馬德里體育會，決賽戲碼就會係「國家打吡」，又有球王美斯喺度，叫座力都有保證；偏偏巴塞唔爭氣，就算美斯同倒戈馬體會嘅基沙文入波，最後竟然反輸2:3，決賽由國家打吡變成馬德里打吡，頓時失色好多。
巴塞最後10分鐘反輸
今場五個入球都喺下半場先出現，馬體會先由佐治高基開紀錄，而巴塞之後靠美斯同基沙文各入一粒反超前，但佢哋之後有兩個入波都被VAR推翻，拉唔開個比數，加上門將尼圖最後10分鐘內2次犯錯，馬體會靠艾華路莫拉達同安祖哥利亞一人一球，最終反勝巴塞3:2入決賽。巴塞一班球員完場時都頭耷耷，點知有個當地球迷跑咗落場想攬吓偶像，雖然美斯離遠見到呢位球迷衝向自己，但都係反應唔切，被對方從後熊抱，嚇到樣都變埋。
新C朗挑機美斯嬲爆
美斯賽後忍唔住批評球隊：「我哋呢場太多幼稚錯誤，被對方幾腳就打到入禁區。我哋踢咗80分鐘好波，最後都要輸。」其實美斯呢場波一早踢出火，因為宿敵基斯坦奴朗拿度（C朗）嘅國家隊後輩、有新C朗之稱嘅馬體會前鋒祖奧菲歷斯，竟然連球王都唔畀面。話說臨完半場嗰陣，菲歷斯同佐迪艾巴嗌交，後者用手篤佢塊面，菲歷斯就嬲嬲地咁一手撥開，然後美斯就上前理論，結果菲歷斯叉腰同對方對視，好彩雙方冇打起上嚟。
不過，決賽冇咗美斯，家陣皇馬就連夏薩特、賓施馬同加里夫巴利都踢唔到，場決賽真係可以話冇睇頭。不過，施丹帶皇馬八次打入決賽都捧到盃，睇吓施蒙尼隊馬體會破唔破到呢個走勢。