【驗樓直擊】從事金融業的陳先生，2017年以約660萬元買入恒地（012）西營盤翰林峰一個224方呎中層戶，收樓前找來資深驗樓師詹濟南驗收。
恒地今次委聘中國建築旗下中海房作為翰林峰承建商，有別於以往恒地旗下子公司承建，交樓質素高下立見；詹sir表示未計此單位，團隊已驗收三伙，得分由50多分至60多分，今次驗收單位獲76分，暫時最高。
欄杆漏唧膠 多處油漆粗糙
談到買入單位原因，業主陳先生表示，「呢個單位向南，望港大，環境安靜。想讀書、想入港大，或者想吸收多啲書卷氣，係幾好嘅地方；又有綠油油山景，樓下有會所又近地鐵站。無論外籍人士、中環白領、港大或附近讀書嘅人都適合租呢度……同埋地契999年，地租平啲，幾乎唔使點畀。地方唔算好細，200幾呎都叫超過劏房水平」。
詹sir入到廳房合一的約100方呎空間，先講油漆，間接批評特首林鄭月娥，「有時啲漆婆亂咁嚟，我指油漆婆。曾經碰過一個漆婆，係又譴責唔係又譴責，人哋過砂紙又話人磨損，一味叫人檢討，自己唔知發生乜事。漆婆做得咁差，都要繼續做落去，因為啲人都要髹油，係難為住喺入面啲人」。
評價油漆工夫後，詹sir講到牆身及橫樑，「橫樑應該要平均咁表現出來，結果橫樑唔持平，側埋一邊。均衡、持平先係好樑，如今大肚、唔平衡，唔係一條好樑，做得差。上樑不正，嗯……睇吓下牆，都歪嘅」。所指下牆歪，是高低不平橫樑旁油漆粗糙。
至於靠近開放式廚房一邊是結構牆，詹sir指：「呢幅係永久牆，表面仲光光滑滑，但有時驗樓要小心，隨時金玉其外，敗絮其中，特別近窗邊有水迹。」開放式廚房選用伸縮水龍頭，「開熱水時水管膨脹咗，伸縮冇咁順，一味用力拉係冇用，要用涼水『滋潤』吓條管，涼涼地滋潤吓……你睇，支伸縮管就好易收埋」。
結果，詹sir評單位得76分，其中欄杆零分，因為漏了兩條「唧膠」；油漆扣40%分數，因多處粗糙；窗扣一半分因玻璃崩花、唧膠有窿，「仲有條膠揈揈下」。他旗下團隊早前驗收此盤三個單位，分數由50多至60多分，主要由於鋅盆、去水喉漏水。
80單位放租 叫價1.6萬起
恒地發言人回覆，上述單位所有需要執修的項目已完成修繕，將與業主保持溝通，盡快安排業主到場驗收。
樓盤租賃方面，利嘉閣地產黃祥勇表示，此盤5座低層C室，實用面積216方呎，早前以1.5萬元租出，呎租約69元；業主2017年5月以595.3萬元買入，租金回報率逾3厘。
本月屋苑暫錄四宗租務成交，現時有80個單位放租，租金叫價由1.6萬元起。