個幾月前，與記者小G到尖沙嘴朗廷酒店唐閣出席飯局，未行到之前，於北京道碰到旅遊R，原來佢嘅寫字樓就是在尖西，午飯時間常在北京道、廣東道、彌敦道南出現，旅遊R話好久不見，不如約時間一聚，當然好啦！但旅遊界人士成日飛，大家揀日子，最快可以一同吃飯嘅時間就係1月7日，旅遊R話佢熟晒尖西，由佢搵地方。
於是小G與左丁山及另外兩位旅遊R點名嘅女士在1月7日一齊到達吃飯地方，當然係R先生訂位啦！佢方便我哋坐地鐵過海，訂了iSQUARE 30樓之「南海一號」，聽講幾出名，當然冇唐閣咁巴閉（米芝蓮三星吖嘛），中午時分，只得三成左右入座率，旅遊R都嚇咗一跳，佢話：「以前中午經常滿座冇位嘅噃。」所以話今時今日做餐飲生意，確係捱得辛苦。呢間粵菜廳估唔到最好食嘅係西式甜品，一款椰子芒果蛋糕，外面包一層朱古力，外形似足一個未開殼嘅小椰青，大家一致讚好。
旅遊R話2019年最壞嘅投資就係朋友上半年開餐廳，由七月一號開始蝕到依家！好彩最後佢冇入股，避過一劫，佢鍾意美食，又愛飲紅酒，因做旅遊而周遊列國，嚐盡天下美食，所以有朋友招攬佢入股搞餐廳。點解最後唔投資呢？旅遊R話：「人都老咯，又經常身在外地，冇謂再投資於新行業啦，享受人生好過。」
旅遊R話旅遊業有結構性轉變，傳統生意畀旅遊網站（如Expedia之類）顛覆晒，機票加酒店根本冇得做，帶團出埠只收到中低檔價錢，故此導遊在旅遊巴上推銷土產賺佣，呢一套今天已冇人吼，加上香港人鍾意自由行自駕遊，旅行社冇啖好食；十幾年前佢已退出大型旅行團市場，全力開發郵輪遊，歐洲多瑙河，塞納河遊及極高檔小眾遊，現在算係進入收成期，高檔熟客生意唔憂做，最近適應時勢，搞埋移民顧問業務，熱點係葡萄牙。小G係C朗大粉絲，一聽見葡萄牙就興奮，問移民葡萄牙有乜好，旅遊R話：「嗱，五十萬美元買樓有交易，平過香港一層納米樓，每年只須住一個星期，連續住五年就可以獲得居留身份證，想入籍就要考葡萄牙文，程度要求普通，要及格並不困難，葡萄牙屬南歐便宜生活費地區，天氣不冷，具地中海風情，大量西歐退休人士鍾意葡萄牙天氣好，生活費便宜，視之為退休天堂。」小G聽完講一句：「唔怪得青年才俊沈旭暉教授都移民葡萄牙啦！」咦！沈教授係世界人，極具國際視野，難怪會快人一步啦！