李斯特城周三喺半場落後0:1下，憑後備嘅伊恩拿祖喺74分鐘入番球，幫李城喺英聯盃4強首回合主場1:1逼和阿士東維拉。家陣英超排第二嘅李城，今場對護緊級嘅維拉形勢佔優，但28分鐘，維拉由古爾拔接應安華艾加斯嘅傳送射入先開紀錄，維拉半場領先1:0。李城到74分鐘先追平，後備上陣嘅伊恩拿祖接應占美華迪助攻後喺禁區破網，次回合再砌過。