好多被捕示威者都被扣留喺荔枝角收押所，民主黨林卓廷早幾日爆料，話收到喺收押所在囚人士投訴，近日飯盒由發泡膠盒改為紙盒，保暖功能差，搞到佢哋要捱凍飯盒，食完仲要肚痛。
紙盒保暖功能差
叙福樓主席黃傑龍噚日喺fb透露，身為飲食業對在囚人士膳食問題都好關注，佢作為太平紳士（JP）去咗巡荔枝角收押所，亦跟進咗飯盒問題。據佢了解，收押所有約200個被羈留人士選擇自己畀錢食「私家飯」，由家人直接向指定餐廳訂飯盒；改用紙盒唔係懲教署要求，係餐廳自願響應環保做，飯盒凍晒亦唔完全關紙飯盒事，原因係飯盒由餐廳送去收押所要時間，之後懲教署人員又要逐個盒飯檢查有冇違禁品，查完200盒飯，好難唔凍，佢已特別提醒收押所主管，檢查時應該盡量快手。黃傑龍又提到收押所都有提供即時烹調嘅早午晚三餐熱食，佢仲要求即場試食多士同雞翼，覺得味道算OK，不過佢補充話：「特別煮畀我食，同平時同唔同呢？好難講。」