講過「我只剩下三萬警察」嘅特首林鄭月娥，因為漠視普羅大眾市民訴求，除咗警隊，實際上冇乜人撐佢，所以佢一直漠視「查警謊、止警暴」訴求，反而不斷抬舉警隊都唔係令人好意外。
引述習總全力支持
繼上周二除夕同警務處處長鄧炳強到警總探望警員、發表「正義永遠在我們一邊」言論後，警隊最新一期《警聲》更爆料指林鄭同日仲去信鄧炳強，形容警隊嘅「傑出表現」值得高度讚賞，感謝警隊竭力維持香港治安。有網民突破盲腸，「差佬是否傑出，自己心照啦！」
據《警聲》刊載嘅信函，林鄭信中除不停以「專業盡責」、「無畏無懼」等四字詞大讚Popo，指政府全力支持警隊嚴正執法外，亦指自己去北京述職嗰陣，中共國家主席習近平都喺會面中公開全力支持警隊執法，最後引述警方「忠誠勇毅，心繫社會」嘅新版座右銘，話深信警隊會竭盡所能，服務香港，再向警隊表達「由衷謝意」。
睇返信件係林鄭上周二發出，佢同日亦曾到警總會見警隊後勤人員，聲稱「相信正義會站在我們一方」，又稱「可以說香港沒有了這支警隊，我們的日子很難過」。據《警聲》話，林鄭亦對警察公共關係科人員「勞心勞力」同工作成效表示讚賞，咁咪即係包括近日死撐扯走民主黨立法會議員許智𥧌眼罩並噴椒係符合武力指引嘅警察公共關係科高級警司（媒體聯絡及傳訊）er er sir江永祥？
「好仔唔當差」呢個口號，過去半年不絕於耳，最新一期《警聲》就透露「一直積極按照市場情況適時調整招募策略」嘅警隊，上月喺北京進行招募，針對在當地就讀嘅香港大學生設置招募攤位同舉行分享會，唔知當中幾多人會成為新一代Popo呢？
李八方