歐鎧淳早前被《蘋果》獨家踢爆疑性向急轉彎，同女籃球運動員倪碧賢親密嘴對嘴，之後歐鎧淳直認同胡子彤已分手。胡子彤甩拖後未有停工，噚日佢現身啟德為ViuTV新劇《地產仔》開工，喺劇中飾演見習地產經紀，戴眼鏡着起西裝，同大班演員喺豪宅外拍爭客戲。
「過咗去展望將來」
農曆新年期間胡子彤會陪家人，不過佢話希望有機會外遊放鬆，問到係唔係要去散心療情傷？佢話：「唔係，只係想有時間畀自己沉澱吓，嚟緊會有新計劃，就係唱電影主題曲，歌詞都係我寫，所以之後都會學唱歌同練結他。」
提到分手後嘅心情？胡子彤最初唔想多講，提到歐鎧淳戀上同性，胡子彤話：「唉，過咗去嘅嘢就展望將來。」佢話雖然已分開，但會祝福對方：「都知佢要準備比賽，希望佢有好成績，亦希望佢開心。」又指𠵱家唔係適當時候同歐鎧淳再有聯絡，目前會專注自己事業。對於接受新戀情，就言之尚早。講到早前發佈莫文蔚歌曲《外面的世界》，係唔係等對方回心轉意？胡子彤否認話：「我好鍾意莫文蔚，鍾意聽佢嘅歌。」
吳肇軒支持兄弟
另外，同劇嘅吳肇軒、廖子妤同余香凝等噚日都有現身，吳肇軒同廖子妤受訪時透露劇中有感情線。提到胡子彤受情傷，作為好友嘅吳肇軒直言會全力支持兄弟，同時讚對方開工時表現專業。
撰文：馮仁昭
