反送中運動持續咗半年，唔少人都開始用消費嚟表達自己嘅抗爭意向，形成黃色經濟圈，而藍店就受到抵制，TVB更加成為狙擊對象。估唔到呢個行為竟然受到警隊重視，特登喺facebook出片，指摘有網民發起抵制或追擊喺某間傳媒賣廣告嘅產品，雖然畫面截圖打咗格，淨係見到「抵制CC___」，但都意會到係講緊CCTVB。
批評網民杯葛TVB
警方仲話有人點名威嚇某啲公司要喺限期前停止喺某電視台賣廣告，否則會向嗰間公司發動攻勢，形容「呢種手法係黑社會常用嘅滅聲手法，佢哋向商戶施壓，脅迫就範，煽動仇恨，更加有機會犯法」，涉嫌恐嚇，又話有公司報咗警，由商業罪案調查科跟進。
不過聽聽吓，唔知大家有冇諗起一個人呢？要講到數媒體廣告嘅KOL，「國家領導人」梁振英絕對係代表！689一直「不遺餘力」咁每日數《蘋果》嘅廣告，巨細無遺列明邊間公司同賣咗幾大版廣告，再加句「恥與為伍」，唔知同警方所講嘅黑社會滅聲手法、向商戶施壓、煽動仇恨、有機會犯法有咩唔同呢？