利物浦前鋒沙迪奧文尼星期二首奪非洲足球先生，早喺頒獎前已係意料中事，皆因兩大競爭對手穆罕默德沙拿同馬列斯都冇到場，而沙拿唔會出席嘅新聞，一日前已從非洲足協官員口中得知。
一名唔願透露姓名嘅非洲足協官員向傳媒爆料，指原本安排咗兩架飛機，一架提早接文尼過嚟頒獎禮舉辦地點、埃及城市洪加達做準備，另一架則由倫敦希斯路機場起飛，再接載沙拿同馬列斯；由於馬列斯要為曼城出戰英聯盃嚟唔到，所以架飛機變成只接沙拿一個，但後來架機取消埋，皆因沙拿都唔會出席頒獎禮。
馬列斯事後就缺席致歉，而沙拿喺文尼當選後，喺ig出po恭喜呢位利物浦隊友（圖）。沙拿已係2017同18年2屆非足先生得主，而今年則屈居文尼之後排第2。