陳偉琪喺劇集《愛．回家之開心速遞》飾演「細龍太」深入民心，佢去年10月涉嫌酒後駕駛被捕，被控一項酒後駕駛罪，案件噚日早上喺東區裁判法院提堂。28歲嘅陳偉琪大約喺9時半着住深藍色套裝抵達法院，對於控罪，佢喺庭上表示：「明白控罪。」裁判官將案件押後至下月5日早上繼續聆訊。
「一定擔心」
大約早上10時26分，陳偉琪喺律師陪同下離開，講到押後聆訊，搞到農曆新年期間有官司喺身，佢話：「都係交畀律師處理，佢哋會諗最好嘅辦法，需要時間去處理文件。」問到心情如何？佢話：「一定擔心，自己之前喺屋企都有反思，自己都有改進，呢段時間都有戒酒。」問到工作有冇受影響，佢話感激家人、公司同客戶嘅支持，畀咗好多機會佢。佢又話要繼續擔保，但唔使去警署報到。
案情指去年10月25日，陳偉琪喺跑馬地成和道駕駛寶馬房車期間，同一輛的士相撞，警員調查後發現陳偉琪未能通過酒精呼氣測試，接近超出法例限制三倍，陳偉琪涉嫌酒後駕駛被捕，遭帶返警署調查。
案件編號：ESCC64/2020
撰文：馮仁昭
