古天樂與宣萱昨日合體到灣仔出席護膚品活動，二人即席為模特兒護膚，但古仔卻錯手以相反方向示範，原先是幫助肌膚拉提，卻變成皮膚下垂，認真搞笑。無綫由昨晚起重播古仔跟宣萱在1997年主演的劇集《美味天王》，古仔笑言：「大家記得夜晚12點準時熄電視，我不嬲都唔會睇返自己演出，唔係因為尷尬，只係唔會特別睇返自己演出。」古仔指父母會為他剪報及儲下過往的作品，他說：「以前好多作品嘅錄影帶都會有，但係𠵱家未必有錄影機睇返，而且做人要向前看。」至於宣萱則不介意重看自己過往演出，她笑說：「見到自己好似馬騮頭好好笑。」
送禮賀林峯新婚
近來二人經常合作，古仔表示與宣萱認識二十載，彼此清楚對方性格，容易溝通有利合作，他說：「我哋從來冇鬧過交，大家作為演員最多只係方向唔同。」宣萱指二人有永恒的默契，有事可直話直說，完全沒有芥蒂。
剛完成新戲《反貪風暴》拍攝的古仔，農曆新年前將會開拍另一部電影，問到是否積極開戲為同業製造工作機會？古仔說：「唔單止電影業，係整個經濟環境，希望大家都一齊努力。」雖然又要開拍新戲，但他仍會留數日時間在港陪伴家人拜年。此外提到好友林峯宣佈已婚，古仔及宣萱表示會送禮物祝賀他，只是未想到送甚麼。
蔣怡憂流感嚴重
同場的蔣怡早前帶一歲半的兒子及六歲女兒到成都旅行探親，現時流感高峯期，又出現武漢不明肺炎，蔣怡表示：「去嘅時候唔知咁嚴重，返嚟先知，香港都流感嚴重，自己會小心啲，有同其他媽咪傾幾時同小朋友打流感針。」
採訪：張明
攝影：陳俊強