朱千雪去年8月同醫生男友吳昆倫（Justin）秘密喺印尼峇里島拉埋天窗後，逐漸淡出幕前，專心攻讀法律系博士課程，Justin則留喺新加坡工作，平日需要香港新加坡兩邊飛。噚日就有周刊報道，指現年31歲嘅千雪疑似已懷孕5個月，早前Justin喺香港陪老婆出街時，全程細心拖到實，千雪仲着住鬆身衫、平底鞋，身形圓潤，睇嚟孕味甚濃。
被指作嘔作悶
報道又指，當日千雪同屋企人外出到餐廳食飯，食飽後千雪即刻見攰，老公見狀急急埋單打算送老婆返屋企休息，不過孝順嘅千雪想陪埋屋企人等車，誰不知等車期間疑似出現妊娠反應作嘔作悶，要旁邊嘅老公拖到實。眼見幸福人妻似乎要準備做媽媽之際，千雪喺回覆傳媒查詢時就主動為傳聞澄清，她首先多謝大家關心，至於自己嘅懷孕傳聞，回應相當簡單，只係一句「肥咗」。相信天下間無女性願意用「肥咗」呢個藉口嚟做掩飾，千雪應該真係因為婚後生活美滿而出現「幸福肥」，想恭喜佢要再等吓先啦。
撰文：馮仁昭
