東京奧運首設混雙比賽，共有16隊組合參賽，上月中在鄭州舉行的世巡賽總決賽，前四名可直入東奧，包括中國、日本、中華台北及香港，以下是東奧排名第三的香港組合黃鎮廷及杜凱琹對對手的評價。
記者：徐嘉華
幾乎完美
許昕（30歲）／劉詩雯（28歲）
（中國／東奧排名第1）
「中國隊整體水平唔使懷疑，佢哋一個左手一個右手，有一定優勢，雖然2018年先開始夾混雙，但越嚟越注重混雙訓練，默契只會越嚟越好。」
冷面殺手
林昀儒（18歲）／鄭怡靜（27歲）
（中華台北／東奧排名第2）
「兩個人都異常冷靜，喜怒不形於色，尤其係男方，比賽中好難睇到佢面上情緒嘅表露，係真正嘅冷面殺手，處處暗藏殺機。」
男穩女兇
水谷隼（30歲）／伊藤美誠（19歲）
（日本／東奧排名第4）
「通常兇嘅係男方，但呢對日本組合剛好相反，年僅19歲嘅伊藤美誠係兇嘅一個，存在一定威脅，東奧爭牌時，我哋好大機會對佢哋，要特別小心。」
