在《愛．回家之開心速遞》演過「趙圓璧」和「標零燕」的陳嘉嘉，去年9月約滿無綫決定離巢，結束11年賓主關係。近日陳嘉嘉在上環的「黃店」坐鎮，為抗爭的年輕人打氣加油，陳嘉嘉曾參加和平遊行，她跟日籍老公同時批評現時港府「有問題」，不能接受警暴，希望7.21元朗恐襲中有更多白衣人被繩之於法。
現年35歲的韋家雄舊愛陳嘉嘉，在2016年閃婚嫁日籍老公山田先生，現育有歲半大的囝囝。陳嘉嘉婚後未有退出繼續在無綫拍劇，但去年9月約滿決定不續約，離開效力11年的無綫，近日她不時到上環「黃店」坐鎮。《蘋果》記者大前日傍晚到食店，正見到陳嘉嘉在打理店內的乾果、蛋糕等，又招呼客人又收錢「一腳踢」。
歡迎年輕人傾吓偈
陳嘉嘉向記者透露這間食店是朋友經營，她並不是老闆：「咁啱我離開TVB，未計劃有乜嘢做，開頭諗住湊仔，後來發現我個同學開咗呢間舖頭，咁啱我都想學吓整餅或者創業，因為我唔知以後仲會唔會喺香港，可能跟老公去日本開舖頭做生意，有一門手藝，自己都可以創業。」
在抗爭運動期間，食店因支援手足而被「懲罰」，陳嘉嘉表示：「我哋嘅立場係支持香港，呢度都係做年輕人生意，希望可以幫佢哋打氣，我哋呢度有心靈書籍，最近嘅社會運動，大家嘅心情都唔係咁好，佢哋嚟到呢度，我哋沖杯嘢飲畀佢哋，傾吓偈，打個卡，如果佢哋願意嚟，我哋都會送啲小食畀佢哋。」被「懲罰」後，生意額有否增加不少？陳嘉嘉謂：「我唔係日日喺度，偶然一個禮拜會有幾日嚟幫手，最近嘅生意都唔係特別好，我諗成個香港氣氛都唔係特別好，但都OK嘅！」
望白衣人繩之於法
陳嘉嘉表示曾參與和平集會，談到警暴，她說：「我支持警方執法，拉一啲製造暴力嘅人，但我唔支持佢哋𠵱家暫時呢刻嘅行動，我唔係好認同呢一刻我喺電視所見到嘅行動，我好希望7.21事件拉到多啲着白衫打人嘅人。」她去年不跟無綫續約，是否因為公司內瀰漫着白色恐怖有關？陳嘉嘉表示：「喺我自己嘅社交媒體上，我都有支持香港抗爭呢件事，但我就冇收過公司任何嘅警告或者暗示嘅說話；其實唔簽係因為我喺無綫11年，加上我有小朋友，可能我有機會再返去！」她指老公是一個在香港工作的日本人，「雖然佢目前仍未完全十分清楚今次社會問題，但佢都覺得𠵱家嘅香港政府係有問題。」
陳嘉嘉囝囝現時已16個月大，在她返工時由家傭照顧，若不用工作便會親自照顧囝囝，她說：「暫時囝囝都會喺香港接受教育，都係睇老公份工嘅安排，睇佢之後會唔會返日本，但短期內我哋都會留喺香港，因為我屋企有三隻狗，都10、11歲，點都會等到佢哋走咗之後先再離開。」陳嘉嘉覺得如果社會運動能夠解決，香港絕對是最宜居的地方。
採訪：黃曉妍
攝影：陳慧安